“Nyukasl” 70 ildən sonra kubok qazandı! - İCMAL
Slot üçün qara mart davam edir.
“Liverpul” Çempionlar Liqasında mübarizəni dayandırmağın ardından daha bir tituldan əlini üzdü. “Nyukasl” elə ilk dəqiqələrdən daha maraqlı, hədəfinə doğru can atan komanda təsiri bağışladı.
Fəal şəkildə pressinq edən, müntəzəm standart vəziyyətlər yaradan, kəskin hücumlar quran “sağsağanlar” fasilə ərəfəsində hesabı açdı. Bern Trippyerin növbəti künc zərbəsindən asmasını uğurla tamamladı. Oyun canlanandan sonra İsak da fərqləndi – ancaq hakimlər briqadası ofsayd qeydə aldı. İsveçli bombardir 52-ci dəqiqədə artıq qaydalar çərçivəsində fərqləndi. İsak hissənin ortalarında intriqanı tam öldürə bilərdi. Ancaq Kelleherlə mübarizədən məğlub ayrıldı.
Nəticədə “qırmızılar”ın ümidləri bir qədər artıq yaşadı. Yalnız uzatma dəqiqələrində qollardan birinin əvəzini çıxmaq mümkün oldu. Sonradan meydana çıxan iki futbolçu – Elliott və Kyeza həmin qolu təşkil etdi. Hesabı bərabərləşdirmək üçün mersisaydlıların nə gücü qalmışdı, nə də vaxtı. Qələbə hesabını qoruyan “Nyukasl” muzeyinə mükafat apardı. ÇL-ə vəsiqə uğrunda da mübarizəni davam etdirən Eddi Haunun komandası üçün ciddi uğurdu. “Liverpul” isə indi yalnız premyer-liqada çempionluğu qazanmaq haqda düşünməlidi. Düzdü, “qırmızılar”la izləyiciləri arasında xal fərqi yetərincə böyükdü.
Ümumiyyətlə, “Nyukasl” son 70 ildə ilk böyük titulunu qazandı. “Sağsağanlar” 1954/55 mövsümündə ölkə kubokunda qələbəni bayram etmişdi. Onların 2006-cı ildə İntertoto kubokunu qazandığını, 2016/17 mövsümündə isə çempionşipin qalibi olduğunu da xatırladaq.
final
Liverpul – Nyukasl 1:2 (0:1)
Liverpul: Kelleher, Kuansa, Konate (Cons, 57), Van Diyk, Robertson, Makallister (Qakpo, 67), Qravenberx (Kyeza, 74), Soboslai, Dias (Elliott, 74), Jota (Nunyes, 57), Salah.
Nyukasl: Poup, Trippyer, Şer, Bern, Livramento, Gimarayns, Tonali, Joelinton, Mörfi (Kraft, 90), İsak (Uilson, 80), Barns (Uillok, 82).
Qollar: Bern, 45 (0:1). İsak, 52 (0:2). Kyeza, 90+7 (1:2).
Vərəqələr: Poup, 90. Tonali, 90+9 - sarı.
Hakim: Con Bruks.
16 mart. London. 88513 tamaşaçı.
Fakt
Salah “Liverpul” karyerasında ilk dəfə 90 dəqiqə meydanda olduğu oyunda nə bir qol vəziyyəti yaratdı, nə də bir zərbə vurdu. 32 yaşlı misirli cari mövsümdə keçirdiyi 43 oyunda 32 qol vurub, 22 məhsuldar ötürmə verib.
Oyundan sonra
Arne Slot, “Liverpul”un baş məşqçisi:
“Oyun rəqibin istədiyi kimi keçdi. Onlar məhz belə oyuna can atırdılar. Biz heç cür öz ritmimizi yaxalaya bilmədik. “Nyukasl” çox aqressiv oynadı, yaxşı müdafiə olundu. Rəqibin qələbəni haqq etdiyini deməliyəm”.
Eddi Hau, “Nyukasl”ın baş məşqçisi:
“Bütün gün həyəcanlıydım, özümə bənzəmirdim. Ortaya nəyin qoyulduğunu bilirdik, bu mükafatı qazanmaq, azarkeşlərimizə qürurlanmaq üçün əsas vermək istəyirdik. Oyundan və nəticədən razıyam – qələbəni haqq etdik. “Liverpul”un qolundan sonra çətinlik çəkdik. Mən artıq əlavə vaxt haqda düşünməyə başlamışdım”.
Digər xəbərlər
