“Liverpul” xal itirdi, Salah yenə fərqləndi - İCMAL
Premyer-liqada 29-cu turun “Aston Villa” – “Liverpul” oyunu vaxtından bir ay əvvəl keçirildi ki, bunun da səbəbi var.
"Football-plus.az" xəbər verir ki, "qırmızılar” martın 16-da Liqa kubokunun finalında “Nyukasl”la qarşılaşacaq.
Birmingemdə keçirilən oyuna gəlincə, “Liverpul” ilk dəqiqələrdən rəqibi öz qapısına sıxışdırdı. İlk dəqiqələrdə Minqs Jotanın cərimə meydançası daxilindən zərbəsinin qarşısını aldı. Ardından təşəbbüsü ələ keçirən meydan sahibləri hətta qol vurmağı da bacardı. Ancaq Reşford ofsaydda olduğuna görə qol qeydə alınmadı. Mersisaydlılardan Soboslai fərqlənə bilərdi. Qapıçı onu qabaqlayaraq zərbə vurmasına imkan vermədi. 29-cu dəqiqədə birmingemlilər heç nədən qapısında qol gördü. Qarsiya topu Jotaya “bağışladı”, o isə Salahı zərbə mövqeyinə çıxardı. Cəmi 9 dəqiqə sonra hesab bərabərləşdi. Soboslainin topu cərimə meydançasından uzaqlaşdıra bilməməsindən Tilemans yararlandı. Uzatma dəqiqələrində isə Uotkins meydan sahiblərini irəli çıxardı. 2-ci hissənin əvvəlində “Aston Villa” fərqi artıra bilərdi, amma Reşfordun zərbəsindən sonra Konate topu boş qapıdan çıxardı. Hər halda, “Liverpul” hesabı bərabərləşdirə bildi. Jora topu tirə vursa da, Salahdan ötürmə alan Aleksander-Arnold qapının uzaq küncünü dəqiq “nişan aldı”. Sonda meydanda daha açıq və əsəbi xarakter daşıyan oyun getdi. Topu qapının yanından vuran Nunyes yüzfaizlik qol imkanını qaçırdı. Remzinin qolu isə ofsayd üzündən qeydə alınmadı.
29-cu turdan irəli çəkilən oyun
Aston Villa – Liverpul 2:2
Tilemans, 38. Uotkins, 45+3 – Salah, 29. Aleksander-Arnold, 61. (41910)
Liverpul: Alisson, Aleksander-Arnold (Bredli, 66/Kuansa, 89), Konate, Van Diyk, Robertson, Qravenberx, Makallister (Dias, 86), Salah, Cons, Soboslai, Jota (Nunyes, 66).
1. Liverpul – 61 (26), 2. Arsenal – 53 (25)... 9. Aston Villa – 39 (26)...
Bombardirlər: Salah (Liverpul) – 24.
Fakt
Salah növbəti qolunu vurmaqla İngiltərə çempionatında yeni rekord müəyyənləşdirdi. O, mersisaydlıların sabiq forvardı Luis Suaresin rekordunu yenilədi. Cari mövsümdə premyer-liqada səfər oyunlarında qol sayını 15-ə çatdıran misirli ulduz turnirin tarixində yeni rekordçuya çevrildi. Uruqvaylı Suares isə 2013/14 mövsümündə səfər oyunlarında 14 qol vurmuşdu.
Ümumiyyətlə, Salahın bu mövüm bütün turnirlər çərçivəsində keçirdiyi 37 oyunda 29 qol və 20 məhsuldar ötürmə ilə yadda qaldığını xatırladaq.
Oyundan sonra
Arne Slot, “Liverpul”un baş məşqçisi:
“Bəli, bu gün 2 xal itirdik. Heç-heçədən razı qala biləcəyimiz yeganə məqam odu ki, son dəqiqələrdə rəqibin 3-cü qolu vurmaq üçün yaxşı şansı var idi. Bax, həmin şansı nəzərə almasaq, sevinmək üçün heç bir əsasımız yoxdu. Heç-heçə meydanda yaşananları tam əks etdirmir. Düşünmürəm ki, ilk yarıdan sonra 1:2 uduzmağı haqq edirdik. Ancaq futbolda belə hallar da olur”.
Digər xəbərlər
