Liqa kubokunda yarımfinalın cavab görüşləri maraqla gözlənilirdi. Axı imkanları daha yüksək qiymətləndirilən “Liverpul”la “Arsenal” ilk oyunda uduzmuşdu.

Belə görünür ki, “topçular” özləri də evdə “Nyukasl”a 0:2 uduzandan sonra finala çıxacağına inanmırmış. Onlar ÇL-də hədsiz çox güc, enerji və emosiya sərf etmişdilər, üstəlik premyer-liqanın son turunda “Mançester Siti” ilə oyunu da unutmayaq. Bütün bunların fonunda Liqa kubokundakı qarşılaşma o qədər də vacib görünmürdü. Hərçənd Arteta meydana döyüşkən heyət buraxmışdı. “Arsenal” lap əvvəldən təşəbbüsü ələ keçirməyə çalışdı. Ancaq bu turnirə mövsümü hansısa titulla bitirmək prizmasından yeganə şans kimi baxan “Nyukasl” çox etibarlı və inadkar komanda təsiri bağışladı. Artıq 19-cu dəqiqədə hesabı açan “sağsağanlar” ümumi üstünlüyü bir qədər də möhkəmlətdi. “Topçular” isə heç cür işə düşmədi. “Nyukasl” hətta qonaqlar topa sahib olandan da meydanda hadisələrin axarına nəzarət edirdi. 2-ci hissənin əvvəlində meydan sahibləri növbəti qolu vurmaqla oyunun taleyinə aydınlıq gətirdi. Bundan sonra yalnız final fitini gözləmək qalırdı.

“Nyukasl”ın finaldakı rəqibi “Liverpul” oldu. Ona görə ki, digər yarımfinal duelində möcüzə baş vermədi. Hərçənd “Tottenhem”in ilk oyundakı qələbəsi fərqli mülahizələrə yol açmışdı. “Qırmızılar” evdə “mahmızlar”a göz açmağa imkan vermədi. Zədələrdən əziyyət çəkən qonaqlar ilk yarıda az-çox dözdü. Kinski bir neçə dəfə komandasını xilas etdi, Soboslainin qolu ofsayd üzündən sayılmadı. Hər halda, “Liverpul” Bissumanın səhvindən yararlanaraq bir dəfə “Tottenhem”in qapısına yol tapdı. 2-ci hissədə artıq qonaqların heç bir şansı yox idi. 50-ci dəqiqədə Nunyesin qazandığı penaltini Salah dəqiq yerinə yetirdi. Ardından Qakpo və Qravenberx qonaqların qapı dirəyinin “möhkəmliyini yoxladı”, sona 15 dəqiqə qalmış isə fərq darmadağın həddinə çatdı. “Mahmızlar”ın müdafiənin mərkəzindəki kobud səhvi Soboslainin qolu ilə nəticələndi. Son topu tirə vurdu. Cavab hücumunda “Liverpul” künc zərbəsi qazandı. Van Diyk yenicə meydana çıxan Makallisterin ötürməsini qolla tamamladı. Qalan vaxt ərzində “Liverpul”un fərqi artırmaq şansı daha yüksək idi, nəinki “Tottenhem”in təsəlli qolunu vurmaq. “Qırmzılar” titulu qorumaq yolunda növbəti addımı da atmalı olacaq. Düzdü, “Liverpul”la oyunun belə asan keçəcəyini gözləməyə dəyməz. Final oyunu martın 16-da “Uembli”də keçiriləcək.

yarımfinal
cavab oyunları
Liverpul – Tottenhem 4:0
Qakpo, 34. Salah, 51-p. Soboslai, 75. Van Diyk, 80.
Liverpul: Kelleher, Bredli, Konate, Van Diyk (Kuansa, 86), Robertson, Qravenberx, Cons (Makallister, 72), Soboslai, Salah (Elliott, 82), Nunyes (Jota, 72), Qakpo (Dias, 82).
Tottenhem: Kinski, Qrey, Danso, Devis (Mur, 82), Spens, Sarr (Berqvall, 57), Bissuma (Porro, 57), Bentankur, Kulusevski, Rişarlison (Tel, 45+1), Son Hın Min.
İlk oyun – 0:1.
Nyukasl – Arsenal 2:0
Merfi, 19. Qordon, 52.
Nyukasl: Dubravka, Trippyer, Şer, Botman (Kraft, 80), Bern, Holl, Merfi (Uillok, 80),Tonali (Lonqstaff, 87), Gimaraynş (Mayli, 90), Qordon, İsak (Uilson, 87).
Arsenal: Rayya, Timber (Kalafyori, 78), Saliba, Qabriel, Lüis-Skelli, Edeqor (Merino, 61), Parti (Jorjinyo, 78), Rays, Martinelli (Nvaneri, 37), Haverts, Trossar (Sterlinq, 61).
İlk oyun – 2:0.

Oyundan sonra
Mikel Arteta, “Arsenal”ın baş məşqçisi: