Martın 7-də və 9-da Konfrans Liqasının (KL) 1/8 finalının ilk oyunları keçirildi. Bu mərhələnin startı ümumilikdə proqnozları doğrultdu. Amma gözlənilməz nəticə də qeydə alındı.

"Football-plus.az"ın məlumatına görə, Avropanın ikinci mövsümü təşkil edilən “üçüncü dərəcəli” klub turnirinin qrup mərhələsinin yekunlarına əsasən, “Nitsa”, “Vest Hem”, “İstanbul BŞ”, “Vilyarreal”, “Yurqorden”, “Alkmaar”, “Sivasspor” və “Slovan” qrupunda liderliyi təmin etməklə ən güclü 8 iştirakçı sırasına daxil olmuşdu. Bu komandalar birbaşa 1/8 finala vəsiqə qazanmışdılar. Onlar bu mərhələdə pley-offun qalibləri ilə qarşılaşırlar. KL-in qruplarında 2-ci yeri tutan “Fiorentina”, “Anderlext”, “Lex”, “Partizan”, “Dnepr-1”, “Gent”, ÇFR və “Bazel” mübarizəni turnirin pley-off mərhələsində davam etdirmək hüququ qazanmışdılar. Bu komandalara “Qarabağ” kimi Avropa Liqasının (AL) qruplarında 3-cü yeri tutanlar rəqib olmuşdular. Təəssüf ki, Azərbaycanın son çempionu “Gent” ilə iki oyunun nəticəsinə əsasən bərabərliyə (1:0, 0:1) nail olsa da, Belçikadakı cavab görüşündən sonra zərurətə çevrilən penalti seriyasında uğursuzluğa (3:5) düçar olmuşdu.

1/8 finala martın 7-də keçirilən yeganə oyunla start verildi. İtaliyadakı matçın şəksiz favoriti sayılan “Latsio” 18-ci dəqiqədə Pedro ilə “Alkmaar”ın qapısına yol tapdı. Aparıcı hücumçusu İmmobilenin xidmətindən zədə səbəbi ilə yararlana bilməyən romalılar fasilə ərəfəsində cavab qolunu buraxdılar. Niderlandlılar ikinci hissədə daha bir qol vuraraq ilk matçlarda ən gözlənilməz nəticəni reallaşdırdılar. İtaliyanın bu mərhələdə iştirak edən digər komandası isə “doğma divarlar” amilindən yararlana bildi. Yeri gəlmişkən, pley-offda rəqibi üzərində daha böyük top fərqi ilə üstünlüyə yiyələnən iştirakçı “Fiorentina” olmuşdu. Florensiyalılar “Braqa”nı ümumilikdə 7:2 (4:0, 3:2) hesabı ilə məğlub etmişdilər. Amma Vinçentso İtalyanonun komandası “Sivasspor”un qapısından yalnız bir top keçirə bildi.

Avropanın 5 aparıcı liqasının digər üç təmsilçisi mübarizəyə rəqib meydanlarında başladı. “Vest Hem” AEK-i Cənubi Kiprdə iki cavabsız qolla məğlub etdi. Matçın qəhrəmanı dubl edən hücumçu Antonio oldu. Londonlular avrokuboklarda ardıcıl 9-cu qələbəsini qazandılar. İngiltərə klubu bununla öz rekordunu bir daha yenilədi.

Belçikaya səfər edən “Vilyarreal” İspaniyaya heç-heçə ilə qayıtdı. Hesabı qonaq komanda açsa da, “Anderlext” ikinci hissədə məğlubiyyətdən qaça bildi - 1:1.

Postsovet məkanının yeganə təmsilçisi olan “Şerif” 1/8 finala uğursuzluqla başladı. Moldova klubu təhlükəsizlik səbəbi ilə yenə ev oyununu Kişinyovda keçirdi. Fasiləyə bir neçə saniyə qalmış Amraui “Nitsa”nı hesabda önə keçirdi. “Neftçi”nin sabiq italiyalı baş məşqçisi Roberto Bordinin çalışdırdığı tiraspollular ikinci hissədə bir qədər üstün oyun nümayiş etdirsələr də, sonda minimal hesabla uduzdular.

“Lex” isə rəqibini iki cavabsız qolla üstələdi. Polşa klubu öz meydanında “Yurqorden”ə inamlı hesabla qalib gəlməklə növbəti mərhələyə vəsiqə qazanmaq şansını artırdı. İlk oyunlarda ən yüksək məhsuldarlıq Bazeldə qeydə alındı. İsveçrənin eyniadlı komandası “Slovan”la matçda iki dəfə hesabda önə keçsə də, sonda heç-heçəyə razılaşdı - 2:2.