Cümə axşamı Konfrans Liqasının (KL) 1/4 finalına yekun vuruldu.

“Football-plus.az” xəbər verir ki, həlledici 4 matçda çox müxtəlif nəticələr qeydə alındı.

Bu mərhələdə Fransada keçirilən oyun daha çox maraq doğururdu. Səbəb Avropanın aparıcı liqalarını təmsil edən iki komandanın qarşılaşması idi. Yerli “Lill” aprelin 11-də səfərdə “Aston Villa”ya 1:2 hesabıyla uduzmuşdu. Görünür, Paulu Fonseka komandasını cavab görüşünə əla hazırlayıbmış. “Şimallı itlər” matçın əvvəlini yüksək səviyyədə keçirdilər və 15-ci dəqiqədə Yazıcı hesabı açdı. Türkiyəli yarımmüdafiəçi avrokuboklarda “Lill”in formasında 12-ci qolunu vurdu. O, Fransa klubunun qitə arenasında ən yaxşı bombardiri oldu. Qeyd edək ki, 27 yaşlı yarımmüdafiəçi həm də Hakan Çalhanoğlu (İnter) ilə birlikdə avrokuboklarda xarici ölkə klubunun oyunçusu kimi ən çox qol vuran türkdü. Yazıcının komandası fasilədən sonra rəqib qapısına yenə yol tapdı. Andrenin qolu Unay Emerini dərhal Beylini meydana buraxmağa vadar etdi. Təcrübəli mütəxəssis bir neçə dəqiqə sonra hücum xəttini Duran ilə də gücləndirdi. Nəticədə rəqibi qapısına sıxışdıran birmingemlilər son dəqiqələrdə müdafiəçi Keşin qolu ilə iki oyunun nəticəsinə əsasən hesabı 3:3-ə çatdırdılar. Qaçılmaz olan 30 dəqiqəlik əlavə vaxtda qol vurulmadığı üçün penalti seriyasına ehtiyac duyuldu. Bu sınaqdan isə 4:3 hesabıyla İngiltərə klubu qalib çıxdı.

İlk oyunlarda yeganə heç-heçə Çexiyanın Plzen şəhərində qeydə alınmışdı. Yerli “Viktoriya” ilə “Fiorentina” bir-birinin qapısına yol tapa bilməmişdi. Qeyd edək ki, qrup mərhələsini yalnız bir komanda - “Viktoriya” maksimum nəticə ilə başa vurmuşdu. Plzenlilər Florensiyada ev sahiblərinin hücumlarına davam gətirə bilirdi. Amma Kadunun 66-cı dəqiqədə kobud oyuna görə birbaşa qırmızı vərəqə alması onun komandasına baha başa gəldi. Mübarizəni çox böyük çətinliklə əlavə vaxta daşıyan qonaqlar burda iki top buraxaraq uduzdular.
Belçikada PAOK-a 1:0 hesabıyla qalib gələn “Brügge” rəqibini Yunanıstanda da məğlub etdi. İspaniyalı hücumçu Xutqlanın vurduğu iki cavabsız qol komandasının salonikililər üzərində aşkar üstünlüyünü təmin etdi.

Bu mərhələnin ən gec başa çatan oyunu İstanbulda keçirildi. “Fənərbaxça” Yunanıstanda 2:3 hesabıyla uduzduğu “Olimpiakos”u evdə minimal hesabla üstələyə bildi. Lakin penalti seriyasına qədər uzanan matçın qalibi pireylilər oldular.

Beləliklə, yarımfinalın mayın 2-nə təyin olunan ilk oyunlarında “Aston Villa” “Olimpiakos”u, “Fiorentina” isə “Brügge”ni qəbul edəcək. Cavab görüşləri mayın 8-9-da keçiriləcək.

1/4 final, cavab oyunları
Lill (Fransa) - Aston Villa (İngiltərə) 2:1, p. – 3:4 (ilk oyun – 1:2)
Yazıcı, 15. Andre, 68 - Keş, 87.
Lill: Şevalye, Tyaqo Santuş, Diakite, Yoro, İsmaili, Qudmundsson (Kabella, 91), Bentaleb, Andre, Yazıcı (Kavaleyro, 86), Haraldsson (A.Qomes, 77), Devid.
Aston Villa: E.Martines, Keş, Konsa, Torres, Din, Makqinn (Duran, 80), Zanyolo (Rocers, 28), Tilemans, Duqlas Luis, Diabi (Beyli, 68), Uotkins.

Fiorentina (İtaliya) - Viktoriya (Plzen, Çexiya) 2:0, əlavə vaxtda (0:0)
N.Qonsales, 92. Biraqi, 108.
Fiorentina: Terraçano, Dodo (Faraoni, 88), Milenkoviç, Ranyeri, Biraqi, Mandraqora (L.Martines, 90), Artur (Lopes, 66), N.Qonsales (Sottil, 98), Kuame, Belotti (İkone, 88), Beltran (Barak, 75).

PAOK (Yunanıstan) - Brügge (Belçika) 0:2 (0:1)
Xutqla, 33; 45.
Brügge: Yakkers, Sabbe, Ordonyes, Balanta, Meyer, Vanaken, Vetlesen (Zinkernaqel, 83), Nvadike, Skuras (Talbi, 87), Xutqla, Nusa (Ordoi, 76).

Fənərbaxça (Türkiyə) - Olimpiakos (Yunanıstan) 1:0, p. - 2:3 (2:3)
Kahveci, 11.
Bombardirlər: Zahavi (Makkabi T-Ə) - 8, Petkoviç (Dinamo) - 7.