Fevralın 13-də Avropa Liqasının (AL) pley-offuna start verildi. Bu mərhələnin ilk 8 oyunu keçirildi.

Xatırladaq ki, vahid liqa mərhələsində “Latsio”, “Atletik”, “Mançester Yunayted”, “Tottenhem”, “Ayntraxt” (Frankfurt), “Lion”, “Olimpiakos” və “Reyncers” ilk 8 yeri təmin etməklə birbaşa 1/8 finalda oynamaq hüququ qazanıb. Reqlamentə əsasən, mübarizəni yekun cədvəlin 9-24-cü yerlərində başa vuran 16 komanda - “Bude/Qlimt”, “Anderlext”, FKSB, “Ayaks”, “Real Sosyedad”, “Qalatasaray”, “Roma”, “Viktoriya” (Plzen), “Ferentsvaroş”, “Portu”, “Alkmaar”, “Midtüllann”, “Yunion”, PAOK, “Tvente” və “Fənərbaxça” isə pley-offda iştirak edir. Bu mərhələdə iki oyunun nəticəsinə əsasən rəqibini üstələyəcək 8 komanda 1/8 finala çıxacaq.

"Football-plus.az" xəbər verir ki, ilk matçlarda qeydə alınan nəticələrdən sonra “Real Sosyedad”, “Fənərbaxça”, “Ayaks”, FKSB, “Alkmaar”, “Ferentsvaroş” və “Tvente” az-çox üstünlük qazandı. Danimarkada keçirilən oyunun ilk yarısı çox baxımlı alındı. Yerli “Midtüllann” daha çox hücum etsə də, qapıya “Real Sosyedad”ın oyunçuları yol tapırdı. Əvvəlcə cərimə meydançasında kobudluğa məruz qalan Mendes penalti ilə hesabı açdı. O, 20 dəqiqə sonra Kuboya məhsuldar ötürmə verməklə matçın qəhrəmanı oldu. Ruhdan düşməyən meydan sahibləri hücumları davam etdirərək fasilə ərəfəsində qollardan birinin əvəzini çıxdılar. İkinci hissədəki futbolu izləməyə dəyməzdi. Hazırda yalnız avrokubokda çıxış edən danimarkalıların fiziki cəhətdən yorulması, ispaniyalıların isə vaxtı uzatmağa üstünlük verməsi 1:2 hesabının dəyişməməsinə şərait yaratdı.

Qitənin 5 aparıcı liqasından pley-offda çıxış edən ikinci komanda da səfərdə qənaətbəxş nəticəyə nail oldu. Hazırda problemli dövrünü yaşayan “Portu” evdə “Roma” ilə görüşdən əvvəl keçirdiyi 8 oyundan yalnız birində qələbə qazana bilmişdi. Portuqaliya komandasının baş məşqçi vəzifəsinə yenicə təyinat alan Martin Anselminin heyətlə bağlı çətinlikləri vardı. Klub yanvarda “əjdahalar”ın üç ən yaxşı bombardirindən ikisini – Qaleno ilə Niko Qonsalesi satmış, onların yerinə layiqli oyunçular ala bilməmişdi. Martin Fernandeş ilə Qruiçin zədələnməsi də romalılarıın işinə yaradı. Klaudio Ranyerinin təyinatından sonra bir qədər özünə gələn İtaliya komandası fasiləyə az qalmış müdafiəçi Çelik ilə hesabı açdı. “Portu”nun gücü yalnız cavab qolunu vurmağa çatdı. Ev sahibləri hətta Kristantenin 72-ci dəqiqədə meydandan qovulmasından da yararlana bilmədilər. 1:1 ilk matçlarda qeydə alınan yeganə heç-heçə hesabı oldu.

“Ayaks” rəqib meydanında daha sərfəli nəticəyə nail oldu. Amsterdamlılar Belçikadakı matçın bərbad qazonuna uyğunlaşmaq üçün bir hissə əziyyət çəkdilər. Fasilədən sonra qapıya iki dəfə yol tapan Françesko Fariolinin komandası 1/8 finala vəsiqə qazanmaq şansını artırdı. Qeyd edək ki, 16 yaş 350 günlüyündə matçda son nöqtəni qoyan yarımmüdafiəçi Mokyo Niderland futbolunun tarixinə qitə kuboklarında ən yeniyetmə qol müəllifi kimi düşdü!

pley-off, ilk oyunlar
Midtüllann (Danimarka) – Real Sosyedad (İspaniya) 1:2
Buksa, 38 – Mendes, 11-p. Kubo, 31.
Real Sosyedad: Marrero, Aramburu, Elustondo, Paçeko (Agerd, 46), Balda (X.Lopes, 24), Olasaqasti (Subimendi, 46), Mendes, Barreneçea (S.Qomes, 46), Kubo, Oskarsson (Oyarsabal, 74), Marin.

Portu (Portuqaliya) – Roma (İtaliya) 1:1
Moura, 67 – Çelik, 45+5.
Roma: Svilar, Anxelinyo, Çelik, Mançini, Ndika, Kone (Pizilli, 46), Kristante, Lorenso Pelleqrini (Sule, 67), Dibala (Baldantsi, 39), Salemakers (Əl-Şaaravi, 46), Dovbik (Paredes, 75).

Yunion (Belçika) – Ayaks (Niderland) 0:2
Rasmussen, 59. Mokyo, 71.
Ayaks: Pasveer, Roza (Qaay, 72), Ruqani (Şutalo, 46), Baas, Hato, Mokyo, Fits-Cim (Teylor, 72), Klassen, Berqheys (B.Traore, 83), Rasmussen (Qodts, 83), Edvardsen.

Ferentsvaroş (Macarıstan) – Viktoriya (Plzen, Çexiya) 1:0
Abu-Fani, 23.

PAOK (Yunanıstan) – FKSB (Rumıniya) 1:2
Samatta, 22 – Georqita, 50. Dava, 60.

Tvente (Niderland) – Bude/Qlimt (Norveç) 2:1
Eltaef, 5. Van Volfsvinkel, 90+5-p. – Berq, 85.

Fənərbaxça (Türkiyə) – Anderlext (Belçika) 3:0
Tadiç, 11. Ceko, 42. Ən-Nəsiri, 57.

Alkmaar (Niderland) – Qalatasaray (Türkiyə) 4:1
Meynans, 12. Perrott, 37-p. Klasi, 57. Volfe, 66 - Şallai, 20.

Cavab oyunları fevralın 20-də keçiriləcək.

Bombardirlər: Əl-Kaabi (Olimpiakos) - 7, Varqa (Ferentsvaroş) - 6, Akgün, Osimhen (hər ikisi “Qalatasaray”), Ən-Nəsiri (Fənərbaxça), Omorodion (Portu), Höylunn (Mançester Yunayted) - 5.