Ramazan ayında müsəlman olan peşəkar futbolçuların oruc tutması hər il bir çox ölkədə böyük müzakirələrə səbəb olur. Elə bu il də istisna deyil.

''Football-plus.az'' xəbər verir ki, heç də pis mövsüm keçirməyən ''Benfika''da 4 müsəlman futbolçunun oruc tutması fanatlar tərəfindən və yerli mətbuatda müzakirələrə səbəb olub.

Lissabon nəhəngində bilindiyi kimi Türkiyə yığmasının iki aparıcı üzvü - Kərəm Aktürkoğlu ilə Orkun Kökçü çıxış edir. Onların hər ikisi oruc tutur. Onlardan başqa İsveçrədə doğulan, amma Türkiyə vətəndaşlığı olan Zəki Amduni və Albaniya vətəndaşlığı olan isveçrəəsilli Adrian Bayrami da oruc tutur. ''Benfika''nın Çempionlar Liqasının 1/8 finalında ''Barselona''ya qarşı keçirəcəyi oyundan öncə bu futbolçuların durumuna aid yerli mətbuatda bir çox məqalələr dərc olunub. Həmin yazılarda və sosial şəbəkələrdə ümumi fikir belədi ki, oruc tutmaları bu oyunçuların performansına təsir göstərə bilər.

Xüsusilə Kərəm ilə Orkun ''Qartallar''ın liderlərindən hesab olunur və fanatlar onlardan çox şey gözləyir. Portuqaliya mətbuatı orucluq ayının sonuna qədər ''Benfika''nın çətin təqviminə diqqət çəkib. Bu oyunçuların performansının düşməsi komandanın həm ÇL-də, həm də daxili çempionatda iddiasını itirməsinə səbəb ola bilər. Amma bəzi mənbələrin yazdığına inansaq, baş məşqçi Bruno Laje narahatlıq üçün ciddi əsas görmür. Təcrübəli mütəxəssis müsəlman futbolçuların peşəkarlığına güvənir və oruc tutmalarının onların performansına təsir edəcəyini düşünmür.

Hər halda Lajenin ''Barselona''ya qarşı oyunda həm Kərəmi, həm də Orkunu start heyətində meydana buraxacağı gözlənilir. Amduni zatən əsas heyət üzvü deyil. O, bir qayda olaraq ikinci hissələrdə oynamaq şansı qazanır. Bayrami isə bu mövsüm cəmi 3 rəsmi oyunda forma geyib.

Kərəmin bu mövsüm ''Benfika''da 35 rəsmi oyunda 11 qol, 6 məhsuldar ötürmə, Orkunun isə 37 rəsmi oyunda 8 qol, 5 məhsuldar ötürmə ilə fərqləndiyini bildirək.

ƏLİ