Fransada qalmaqal: oruc tutduğuna görə oyundan kənarda qaldı
Bilindiyi kimi, Fransa Futbol Federasiyası hakimlərə oruc tutan futbolçuların iftarını açması üçün oyunların gedişində xüsusi fasilə yaratmasına qadağa qoyub.
“Football-plus.az” xəbər verir ki, bu qərar ölkədə böyük müzakirələrə səbəb olduğu bir vaxtda “Nant”da diqqətçəkən hadisə baş verib. PSJ-nin sabiq baş məşqçisi Antuan Kombuarenin çalışdırdığı bu kollektiv ötən həftəsonu Liqa-1-in 29-cu turunda öz meydanında “Reyms”lə qarşılaşıb və 0:3 hesabı ilə məğlub olub. Sən demə, Kombuare gənc futbolçu Jauen Hacamı oruc tutduğuna görə sözügedən qarşılaşmanın iştirak ərizəsinə salmayıb! Təcrübəli mütəxəssis 20 yaşlı sol cinah müdafiəçisindən oyun günü oruc tutmamağı tələb etsə də, Hacam məşqçinin tələbini rədd edib. Hacam “Paris”in yetirməsidi və ilk peşəkar müqavilkəsini də bu klubla imzalayıb. “Nant”a isə bu mövsümün qış fasiləsində, yəni yanvarda transfer olunub. Fransada doğulan əlcəzairəsilli futbolçu artıq Əlcəzair yığmasında debüt etməyə də macal tapıb.
Məsələ sosial şəbəkələrdə geniş müzakirə doğurduğundan 59 yaşlı Kombuare bu addımına aydınlıq gətirməli olub:
“Ramazan ayından öncə oruc tutmaq istəyən futbolçularla ayrıca görüşüm oldu. Onlarla öz aramızda hər şeyi razılaşdırdıq. Mənim yeganə istəyim odu ki, futbolçular həftəsonu tam hazır vəziyyətdə olsunlar və komandaya yardım etsinlər. Zədələnmələrini istəmirəm. Artıq 20 ildi məşqçilik sahəsindəyəm və nə etdiyimi gözəl bilirəm. Məşqçi mənəmsə, deməli, qaydaları da mən müəyyənləşdirirəm. Oruc tutan oyunçularla həftəboyu heç bir problem yaşamıram. Əksinə, onlara əlimdən gələn qədər yardım etməyə çalışıram. Məsələn, günorta yeməyinə gəlmirlər və əvəzində istirahət edirlər. Eləcə də bir günə iki məşq salanda onları ikinci məşqdən azad edirəm. Çünki onların ziyan görməsini istəmirəm. Amma digər tərəfdən oyun günü ilə bağlı konkret qaydalarımız var. Oyun günü futbolçuların oruc tutması qadağandı. Kim oyun günü oruc tutursa, heyətə düşmür - qısa və konkret. Mən onların oruc tutmasına hörmətlə yanaşdığım kimi, onlar da mənim qərarlarıma hörmətlə yanaşmalıdı. Komandada 6 futbolçu oruc tutur. Onlardan yalnız Hacam oyun günü oruc tutmaqda davam edir. Ona başqa heç bir sanksiya tətbiq olunmur. Oyun günü oruc tutacaqsa, heyətdən kənarda qalması labüddü”.
Digər xəbərlər
