"Komanda qol vəziyyətləri yaratmasa, rəqibin cərimə meydançasına daxil ola bilməsə, oyun ərzində taktiki gedişlər etməsə, baş məşqçini günahlandıra bilərik. Lakin burda Vaqif Cavadovluq nəsə yoxdu. Konkret səbəblərə gəlincə, futbolçuların keyfiyyətindən bəhs etmək olar. "Sumqayıt"da usta oyunçuların sayı azdı. Kollektivdə elə futbolçular olmalıdı ki, ən sadə epizodları belə maksimum dəyərləndirə bilsin. "Gənclik şəhəri"nin təmsilçisi isə yalnız büdcəyə uyğun transferlər edib. İndi Vaqif Cavadov istefa verməlidi? Niyə? Ona nə qədər böyük şans verildi ki? İşə hələ yeni başlayıb. Əfsuslar olsun ki, komandada nəsə çatışmayanda, hansısa problem olanda ilk növbədə məşqçini günahlandırırlar. Heç kim prosesi dərindən təhlil etmir. Beynəlxalq təcrübə onu göstərir ki, bəzən yeni baş məşqçinin yaxşı oyun göstərəcək komanda qurması üçün bir mövsüm belə bəs etmir. Təbii ki, istisna hallarda keyfiyyətli heyət sayəsində bunu daha tez müddətdə bacaranlar var. "Qarabağ" indiki səviyyəsinə çatmaq üçün 4-5 mövsüm dayanmadan çalışıb. Vaqif Cavadova əvvəl zaman vermək, sonra nəsə tələb etmək lazımdı. Hiss olunur ki, baş məşqçinin futbolçularıyla ünsiyyəti yaxşı səviyyədədi. Hər biri meydançada əzmkarlıq nümayiş etdirməyə çalışır. Əlbəttə, dediklərim mənim gördüklərimdi. Komandanın daxilində nə baş verdiyini bilmirik".