''İnter Mayami''nin dünyaca ünlü ulduzu Lionel Messi yenə hər zaman olduğu kimi gündəmdədi.

''Football-plus.az'' xəbər verir ki, argentinalı bu dəfə qeyri-adi bir hadisəyə görə gündəmə gəlib. ''İnter Mayami'' KONKAKAF Çempionlar Kubokunun 1-ci mərhələsində ciddi problem yaşamadı. Komanda ABŞ-ın digər təmsilçisi ''Sportinq Kanzas Siti''ni səfərdə 1:0, evdə 3:1 yenərək mərhələni adladı.

Ötən həftəiçi baş tutan səfərdəki ilk görüşü meksikalı hakim Marko Ortis idarə etmişdi. Ədalət təmsilçisi final fitini səsləndirdikdən sonra Messiyə yaxınlaşaraq ondan nəsə tələb etmişdi. İlk öncə hakimin Leodan forma istədiyi iddia edilmişdi. Amma sonradan məlum olmuşdu ki, Ortis ailə üzvlərinin Messinin fanatı olduğunu bildirərək ondan imza istəyibmiş. ''Qızıl top''un səkkizqat qalibi hakimin bu istəyini geri çevirməmişdi. Bu olayın üstü açılan kimi ''Sportinq Kanzas Siti'' məsələni həm KONKAKAF-a, həm də MLS-ə daşıyaraq hakimdən şikayət etmişdi. KONKAKAF-ın İntizam Komitəsi Ortisin bu davranışının Konfederasiyanın hakimləri üçün qəbulolunmaz olduğunu və rəsmi araşdırmaya başlandığını açıqlamışdı. Bu məsələ qalmaqala çevrildikdən sonra Ortis hərəkətinin yanlış olduğunu, eləcə cəzasını çəkməyə hazır olduğunu vurğulayaraq futbol ictimaiyyətindən üzr istəmişdi.

Artıq araşdırmanın nəticəsi bəllidi. 36 yaşlı hakim KONKAKAF bayrağı altında keçirilən bütün turnirlərdən 6 aylığa kənarlaşdırılıb! Bundan başqa ona ciddi xəbərdarlıq edilib. Maraqlıdı ki, ESPN-nin məlumatına görə Ortis Meksika çempionatının oyunlarına təyinat almaqda davam edəcək. Hərçənd Meksika da KONKAKAF-ın üzvüdü.

ƏLİ