MLS-in Nizam-İntizam Komitəsi Lionel Messini cəzalandırmaq məcburiyyətində qalıb.

Argentinalı superulduzun şərəfini qoruduğu ''İnter Mayami'' ötən həftəsonu yeni mövsümün açılış turunda öz meydanında ''Nyu York Siti'' ilə qarşılaşdı. Gərgin və emosional keçən oyunda Mayami təmsilçisi yalnız əsas vaxta əlavə olunmuş 10-cu dəqiqədə məğlubiyyətdən qurtula bildi (2:2). Final fitinin ardından iki komanda arasında yüngül münaqişə yaşandı. Məhz həmin vaxt Messi rəqib komandanın köməkçi məşqçisi Mehdi Balluşi ilə emosional şəkildə söhbət edərkən əlini onun boynuna qoyaraq nəsə dedi.

MLS-in qaydalarına görə futbolçuların bu cür hərəkətə yol verməyə ixtiyarı yoxdu. Ona görə də ''Qızıl top''un səkkizqat qalibi cərimələnib. Amma pul cəzasının məbləği açıqlanmayıb. Bundan başqa ''İnter Mayami''nin digər tanınmış futbolçusu Luis Suares də analoji hərəkətə görə cərimələnib. Uruqvaylı ulduz ilk hissənin başa çatmasının ardından rəqib komandanın üzvü Birk Risanın boynundan yapışmışdı.

ƏLİ