Dekabrın 11-12-də Avropa Liqasının (AL) əsas mərhələsində 6-cı turun oyunları keçirildi. Artıq pley-offa vəsiqəni təmin edən ilk 7 komanda bəllidi.

Qeyd edək ki, hələlik bu komandalardan heç birinin birbaşa 1/8 finalda oynayacağı dəqiqləşməyib. Başqa sözlə,azarkeşlərini erkən sevindirənlər buna gələn ilin yanvarına təyin olunan son iki turda xal ehtiyatını artırmaqla nail olmağa çalışacaqlar.

İlk 4 turda maksimum nəticə göstərən “Latsio”nun qələbə seriyası “Ludoqorets”lə növbəti oyunda qırılmışdı. Nəticədə vahid liqa mərhələsində xal itirməyən komanda qalmamış və turnir cədvəlində üçhakimiyyətlilik yaranmışdı. Evdə gözlənilməz xal itkisinə baxmayaraq, topların daha yaxşı fərqinə əsasən 1-ci yerdə qalan “Latsio” Niderlandda “Ayaks”a 3:1 hesabıyla qalib gəldi. Baş məşqçi Marko Baroni bu komanda ilə ilk 6 avrokubok oyununda 5 qələbəyə nail olub ki, bu nəticəyə sonuncu dəfə Roma klubunun sabiq çalışdırıcısı, avqustda 76 yaşında dünyasını dəyişən Sven-Yoran Erikssonun dövründə təsadüf edilmişdi. Paytaxt komandası indi də topların daha yaxşı fərqinə görə 1-ci yerdədi.

Romalıların liderlik planında yeganə şəriki “Fənərbaxça”nı Türkiyədə iki cavabsız qolla məğlub edən “Atletik”di. Hesabat turuna şərikli lider kimi başlayan “Ayntraxt” (Frankfurt) isə Lionda eyniadlı rəqibinə 2:3 hesabıyla uduzaraq 5-ci yerə düşdü. Almaniya və Fransa klublarının hesabında 13 xal var. Onlardan üst pilləyə isə “Slaviya”ya Çexiyada 2:1 hesabıyla qalib gələn “Anderlext” yüksəldi.

Beləliklə, “Latsio”, “Atletik”, “Anderlext”, “Lion”, “Ayntraxt”, “Qalatasaray” və “Mançester Yunayted” vahid liqa mərhələsinin sonuna iki tur qalmış azı pley-offda iştirakını təmin etdi. MY-nin buna 6-cı turda nail olması diqqətdən yayınmır. Məsələ ondadı ki, İngiltərə nəhəngi sabiq çalışdırıcısı Erik ten Haqla ilk üç oyunu heç-heçə başa vurmuşdu. Onun istefaya göndərilməsindən sonra baş məşqçi səlahiyyətlərini müvəqqəti icra edən Ruud van Nistelroy PAOK üzərində qələbəyə (2:0) sevinmişdi.

“Qırmızı şeytanlar”ın başında “Bude/Qlimt” ilə oyunda 3:2 hesablı ilk qələbəsini qazanan Ruben Amorimin növbəti sınağı da uğurlu alındı. MY Plzendəki matçın gedişində Onananın kobud səhvindən sonra hesabda geri düşsə də, sonda “Viktoriya”ya 2:1 hesabıyla qalib gəldi. “Bude/Qlimt”dən sonra plzenlilərin də qapısına iki dəfə yol tapan Höylunn indi 5 qolla AL-in şərikli bombardirləri sırasındadı. Amorimin ilk iki avrokubok oyununda qalib gəlməklə klubun əfsanəvi çalışdırıcıları Mett Basbi ilə Aleks Ferqyusonun göstəricisini təkrarladığını da qeyd edək.

Təəssüf ki, vahid liqa mərhələsi yeganə təmsilçimiz üçün uğursuz davam edir. İlk 5 turda “Tottenhem” (0:3), “Malmö” (1:2), “Ayaks” (0:3) və “Lion”dan (1:4) xal ala bilməyən və yalnız “Bude/Qlimt”ə 2:1 hesabı ilə qalib gələn “Qarabağ” 36 komanda arasında 32-ci yerdə idi. Ağdamlılar cümə axşamı “Elfsborq”a da uduzdular (0:1) və 5-ci məğlubiyyət Azərbaycanın son çempionunu turnir cədvəlində 33-cü yerə saldı. Bu nəticə isə “Qarabağ”ın praktiki olaraq mübarizəni əsas mərhələdə dayandıracağı deməkdi.

Ümumiyyətlə, cari mövsüm postsovet məkanından olan komandalar üçün uğursuz keçir. “Makkabi”yə 1:2 hesabıyla uduzan RFŞ 2 xalla cədvəlin 34-cü pilləsindədi. İlk 5 turda xal qazana bilməyən Kiyev “Dinamo”su isə bu dəfə “Real Sosyedad”dan üç cavabsız top buraxdı. Ukrayna klubu AL-də pley-offda oynamaq şansını itirən ilk iştirakçı oldu.

əsas mərhələ, 6-cı tur
Ayaks (Niderland) - Latsio (İtaliya) 1:3
B.Traore, 47 – Çauna, 12. Dele-Başiru, 52. Pedro, 77.
Latsio: Mandas, Latsari (Maruşiç, 46), Patrik (Xila, 72), Jiqo, Luka Pelleqrini (Tavareş, 69), Rovella, Dele-Başiru, Pedro (Genduzi, 88), Çauna, Dia (Zakkanyi, 46), Kastelyanos.

Lion (Fransa) - Ayntraxt (Frankfurt, Almaniya) 3:2
Şerki, 27. Fofana, 50. Nuama, 54 - Knauff, 18. Marmuş, 85.
Lion: Perri, Talyafiko (Abmer, 81), Çaleta-Sar, Niakate, Matiç, Tolisso (Tessmann, 81), Meytlend-Nayls, Şerki (Benrahma, 73), Lakazett (Mikautadze, 81), Fofana, Nuama (Veretu, 72).
Ayntraxt: Trapp, Kollins, Kox, Tuta (Sxiri, 46), Teate, Nkunku (Kristensen, 46), Götse (Uzun, 63), Daud, Şaibi (Marmuş, 63), Knauff (Bahoya, 80), Ekitike.

Viktoriya (Plzen, Çexiya) - Mançester Yunayted (İngiltərə) 1:2
Vıdra, 48 - Höylunn, 62; 88.
Mançester Yunayted: Onana, Mazraui, De Liqt, L.Martines, Dalot (Qarnaço, 81), Kazemiro (Uqarte, 61), Diallo, B.Fernandeş, Malasiya (Antoni, 61), Zirkzee (Maunt, 61), Reşford (Höylunn, 56).

Reyncers (Şotlandiya) - Tottenhem (İngiltərə) 1:1
İqamane, 47 - Kulusevski, 75.
Tottenhem: Forster, Porro, Drequşin, Udoci, Bentankur (Sarr, 61), Bissuma (Berqvall, 61), Qrey, Meddison, Son Hın Min, Verner (Kulusevski, 46), Conson (Solanke, 60).

Real Sosyedad (İspaniya) - Dinamo (Ukrayna) 3:0
Oyarsabal, 19; 33. Beker, 24.
Real Sosyedad: Remiro, Subeldiya, Agerd, Munyos, Aramburu (Odriosola, 58), Mendes (Marin, 46), Olasaqasti, U.Qonsales (Turryentes, 78), Beker, Oyarsabal (Oskarsson, 58), Kubo (Maqunaselaya, 58).

Roma (İtaliya) - Braqa (Portuqaliya) 3:0
Lorentso Pelleqrini, 10. Əbdülhəmid, 47. Ermoso, 90+1.
Roma: Svilar, Əbdülhəmid, Mançini, Hummels (Ermoso, 74), Ndika, Zalevski, Kone, Pizilli (Le Fe, 85), Sule (Əl-Şaaravi, 74), Lorentso Pelleqrini (Salemakers, 74), Dibala (Dovbik, 46).
Hoffenhaym (Almaniya) - FKSB (Rumıniya) 0:0
Hoffenhaym: Baumann, Çaves (Akpoquma, 64), Kaderjabek, Nsoki, Yurasek (Prass, 74), Ştax, Samasseku, Bruun Larsen (Tabakoviç, 72), Bişof (Qeyqer, 64), Kramariç, Qlojek (Moerştedt, 46).

Yunion (Belçika) - Nitsa (Fransa) 2:1
İvanoviç, 33; 90+2 - Qessan, 45+1.
Nitsa: Bulka, Luşe, Bombito, Rosario, Nancu (Kloss, 65), Badaui (Monteyro, 90+3), İ.Kamara (Ndombele, 65), Diop (Busnina, 90+1), Buanani, Mukoko (Lyabord, 65), Qessan.
Elfsborq (İsveç) - QARABAĞ (AZƏRBAYCAN) 1:0
Kasem, 57.

Fənərbaxça (Türkiyə) - Atletik (İspaniya) 0:2
İ.Uilyams, 5; 45.
PAOK (Yunanıstan) - Ferentsvaroş (Macarıstan) 5:0
Tayson, 10. Brendon, 29. Çalov, 76. Jivkoviç, 80-p. Despodov, 89.

Malmö (İsveç) - Qalatasaray (Türkiyə) 2:2
Botheym, 24. Penya, 90+2 – Yelert, 43. Akgün, 56.

Olimpiakos (Yunanıstan) - Tvente (Niderland) 0:0

Ludoqorets (Bolqarıstan) - Alkmaar (Niderland) 2:2
Çoçev, 60, Dua, 63 – Van Bommel, 14. Maikuma, 19.

Bude/Qlimt (Norveç) - Beşiktaş (Türkiyə) 2:1
Zinkernaqel, 37. Byortuft, 43 - J.Fernandeş, 21.

Portu (Portuqaliya) - Midtüllann (Danimarka) 2:0
Namaso, 30. Omorodion, 56.

Slaviya (Çexiya) - Anderlext (Belçika) 1:2
Xorı, 58 – Anqulo, 8. Versxaren, 31.

Makkabi (Təl-Əviv, İsrail) - RFŞ (Latviya) 2:1
Naxmias, 16. Stoiç, 69 – Savalnieks, 52.

1. Latsio 6 5 1 0 14-3 16
2. Atletik 6 5 1 0 11-2 16
3. Anderlext 6 4 2 0 11-6 14
4. Lion 6 4 1 1 15-7 13
5. Ayntraxt F 6 4 1 1 12-8 13
6. Qalatasaray 6 3 3 0 15-11 12
7. Mançester Y 6 3 3 0 12-8 12
8. Reyncers 6 3 2 1 13-7 11
9. Tottenhem 6 3 2 1 11-7 11
10. FKSB 6 3 2 1 7-5 11
11. Ayaks 6 3 1 2 14-6 10
12. Real Sosyedad 6 3 1 2 10-6 10
13. Bude/Qlimt 6 3 1 2 10-9 10
14. Roma 6 2 3 1 8-5 9
15. Olimpiakos 6 2 3 1 5-3 9
16. Ferentsvaroş 6 3 0 3 11-10 9
17. Viktoriya P 6 2 3 1 10-9 9
18. Portu 6 2 2 2 12-10 8
19. Alkmaar 6 2 2 2 9-9 8
20. Yunion 6 2 2 2 5-5 8
21. Fənərbaxça 6 2 2 2 7-9 8
22. PAOK 6 2 1 3 10-8 7
23. Midtüllann 6 2 1 3 5-7 7
24. Elfsborq 6 2 1 3 8-11 7
25. Braqa 6 2 1 3 7-10 7
26. Hoffenhaym 6 1 3 2 5-8 6
27. Makkabi T-Ə 6 2 0 4 7-13 6
28. Beşiktaş 6 2 0 4 6-13 6
29. Slaviya 6 1 1 4 5-7 4
30. Tvente 6 0 4 2 4-7 4
31. Malmö 6 1 1 4 6-12 4
32. Ludoqorets 6 0 3 3 3-8 3
33. Qarabağ 6 1 0 5 4-14 3
34. RFŞ 6 0 2 4 5-12 2
35. Nitsa 6 0 2 4 6-14 2
36. Dinamo 6 0 0 6 1-15 0

Bombardirlər: Varqa (Ferentsvaroş), Akgün (Qalatasaray), Omorodion (Portu), Höylunn (Mançester Yunayted) - 5.

Növbəti turun oyunları gələn il yanvarın 21-23-ü aralığında keçiriləcək: Qalatasaray – Dinamo, Beşiktaş – Atletik, QARABAĞ – FKSB, Alkmaar – Roma, Portu – Olimpiakos, Viktoriya P – Anderlext, Fənərbaxça – Lion, Bude/Qlimt - Makkabi T-Ə, Malmö – Tvente, Hoffenhaym – Tottenhem, Ayntraxt F – Ferentsvaroş, RFŞ – Ayaks, Elfsborq – Nitsa, Mançester Yunayted – Reyncers, PAOK – Slaviya, Ludoqorets – Midtüllann, Yunion – Braqa, Latsio – Real Sosyedad.