İngiltərə premyer-liqasında 26-cı tura dünən baş tutan ''Lester'' - ''Brentford'' oyunu ilə start verildi.

''Football-plus.az'' xəbər verir ki, oyun qonaqların inamlı və asan qələbəsi ilə yekunlaşdı. Hələ fasiləyə qədər 3 qol vuran ''Brentford'' yekunda 4:0-lıq parlaq qələbə qazandı. Bu komanda tarixində ilk dəfə premyer-liqada səfərdə 4 oyunluq qələbə seriyası yaxalamış oldu. Eyni zamanda bu, hazırda turnirin ən yaxşı seriyasıdı.

Əks cəbhədə isə ''Lester'' nəinki özünün, hətta bütövlükdə turnirin tarixinin antirekordunu yeniləyib. Belə ki, ''tülkülər'' evdə ardıcıl 6-cı premyer-liqa oyununda qol vurmadan məğlub oldular! Buna qədər komanda evdə ''Arsenal''a (0:2), ''Fulhem''ə (0:2), ''Kristal Pelas''a (0:2), ''Mançester Siti''yə (0:2) və ''Vulverhempton''a (0:3) qol vurmadan uduzmuşdu uduzmuşdu. Turnir premyer-liqa adı ilə keçirilməyə başlandığı 1992-dən bu yana belə bir hal yaşanmamışdı.

Göründüyü kimi 9 il öncə premyer-liqada çempion olmaqla tarix yazmış ''Lester'' indi artıq tarixi tərsinə yazır. Van Nistelrooy baş məşqçi vəzifəsinə gətirildiyi vaxtdan bu yana komanda premyer-liqada 15 oyuna cəmi 2 qələbə qazanıb.

2012-ci ildən ''Lester''in şərəfini qoruyan veteran forvard Ceymi Vardi ardıcıl 3-cü oyunda meydanı qolsuz tərk etdi. Halbuki onun ''tülkülər''in heyətində rəsmi matçlarda 200 qol həddinə çatmasına cəmi 2 qol qalıb. O, Artur Çandler (273) və Artur Roulinin (265) ardından klub tarixinin ən məhsuldar 3-cü oyunçusu statusundadı.

ƏLİ