Bazar ertəsi Türkiyə Futbol Federasiyasının Rivada yerləşən mərkəzində ölkə kubokunun 1/4 final mərhələsinin püşkatma mərasimi keçirilib.

"Football-plus.az" xəbər verir ki, püşkün nəticəsi ilə sizi tanış edirik: Trabzonspor – İstanbul BŞ, Beşiktaş – Konyaspor, Ankaragücü – Fənərbaxça, Qalatasaray – Fatih Karagümrük. Əvvəlki mərhələlərdə olduğu kimi, bu mərhələdə də qalib bir oyunla bəlli olacaq. Oyunlar fevralın 27-29-su aralığında adı birinci göstərilən klubların meydanında keçiriləcək. Yarımfinalda qarşılaşmaq ehtimalı olan cütlər də bəllidi. Belə ki, “Beşiktaş” – “Konyaspor” cütünün qalibi “Ankaragücü” – “Fənərbaxça”, “Qalatasaray” – “Fatih Karagümrük” cütünün qalibi isə “Trabzonspor” – “İstanbul BŞ” duelinin qalibi ilə qarşılaşacaq. Yəni yarımfinalda “Beşiktaş” – “Fənərbaxça” derbisini izləyə bilərik. Onu da bildirək ki, yarımfinal mərhələsində artıq qaliblər “ev-səfər” prinsipi ilə bəlli olacaq. Yarımfinalların, eləcə də finalın tarixi daha sonra açıqlanacaq. Yeri gəlmişkən, “Ankaragücü” hər nə qədər ortabab sayılsa da, bu komandanın kubokda “Fənərbaxça”ya qarşı statistikası diqqəti çəkir. Belə ki, paytaxt təmsilçisi indiyə qədər kubok çərçivəsində İstanbul nəhənginə qarşı keçirdiyi 16 qarşılaşmada qələbə sayında yalnız minimal fərqlə geridədi – 7:8. Komandalar pley-off mərhələlərində 9 dəfə qarşılaşib. Bunların 5-də “Fənər”, 4-də “Ankaragücü” mərhələni adlayıb.