''Real''ın gənc ulduzları ilə bağlı növbəti şayiələr yayılıb. Arda Gülərin Madrid nəhəngini tərk etmək istəyində olması ilə bağlı mövsümün əvvəlindən bu yana dolaşan iddialara daha biri əlavə olunub.

İspaniyanın ''Sport'' nəşrinin yaydığı məlumata görə Arda DÇ-2026-nı düşünərək gələn mövsüm daha çox oynaya biləcəyi bir kluba yollanmaq istəyir. 19 yaşlı futbolçu icarə əsasında da olsa, bir ili başqa klubda keçirməyə razıdı.

Bu günlərdə PSJ-nin Türkiyə yığmasının üzvünə ciddi maraq göstərdiyi iddia edilmişdi. Luis Enrikenin şəxsən Ardaya zəng vurduğu və onu Parisə dəvət etdiyi bildirilmişdi. Enrike Gülərə ən azı ''Real''dakından daha çox oynayacağına zəmanət vermişdi. Arda ilə yanaşı Endrik də Madriddəki durumundan narazıdı. Bu da təsadüfi deyil. Arda kimi gənc braziliyalı futbolçu da çox az oynamaq şansı qazanır.

Deyilənə görə Endrik ilə Karlo Ançelottinin münasibətləri tamamilə pozulub. ''Sambaçı'' hətta rəhbərliyin qarşısına ''Ançelotti gələn mövsüm komandada qalsa, mən ayrılacam'' şərtini qoyub. Endrik də daha çox oynaya biləcəyi bir kluba icarəyə yollanmaq istəyir.

Arda bu mövsüm 27 rəsmi oyunda iştirak edərək ümumilikdə 967 dəqiqə meydanda olub və aktivinə 3 qol, 5 məhsuldar ötürmə yazıb. Endrik isə 22 rəsmi oyunda ümumilikdə 400 dəqiqə şans qazanıb və 5 qol, 1 məhsuldar ötürmə ilə fərqlənib.

ƏLİ