“Liverpul” və “Çelsi” tituldan əlini üzdü, MS də çətinlik çəkdi - İCMAL
Həftəsonu İngiltərə kubokunda 1/16 final mərhələsinin oyunları keçirildi.
Nəhənglərin oyunlarının icmalına keçməmiş xatırladaq ki, “Arsenal” hələ ötən mərhələdə “Mançester Yunayted”ə uduzmaqla mübarizəni dayandırmışdı. “Liverpul” da “qırmızı şeytanlar”a qoşuldu. “Qırmızılar”ın martın 16-da ölkə kubokunun finalında “Nyukasl”la qarşılaşacağını nəzərə alsaq, çempionşipin autsayderi “Plimut”dan alınan məğlubiyyəti bəlkə də itki saymağa dəyməz. Aşağı dəstə təmsilçisi Hardinin penalti qolu ilə qalib gəldi. Əslində kiçik klubların kubokun erkən mərhələlərindəki qələbəsi İngiltərə futbolu üçün adi tendensiyadı. Elə bir qədər sonra haqqında danışacağımız “Mançester Siti” də D-3 klubu “Leyton” önündə “ağ bayraq qaldırmağa” yaxın idi. Arne Slot “Plimut”la oyunda Van Diyk, Salah və bir çox başqa liderlərini qorumaq fikrinə düşdü. “Qırmızılar”ın idman şərəfini gənclər, ehtiyatda qalanlar, bir də onlara kömək etmək üçün meydana çıxan Diasla Jota qorumalıydı.
İki ulduzun meydanda görünməsi qələbə gətirmədi. Demək olar ki, top onlara çatmırdı. “Plimut” gənclərə “yapışqan” oyun təklif etdi. Meydan sahiblərinin 52-ci dəqiqədə qazandığı penaltini Hardi qola çevirdi. Maraqlıdı ki, “Liverpul” həmin vaxta qədər rəqib qapısına yalnız bir zərbə vurmuşdu. Qoldan sonra meydanda vəziyyət tədricən Slotun komandasının xeyrinə dəyişdi. Ancaq bu da bərabərlik qolu üçün kifayət etmədi. Yalnız sonda qonaqların iki real qol imkanı oldu. Onda da əvvəlcə gənc müdafiəçi Makkonnellin zərbəsi dəqiq olmadı, ardından künc zərbəsi zamanı “Liverpul”un qapıçısı Kelleher topu düz rəqib həmkarının üstünə vurdu. “Qırmızılar” mövsümü 4 titulla bitirmək şansını itirsə də, hələ də üç cəbhədə mübarizəni davam etdirirlər.
Bildiyiniz kimi, turnirin son qalibi MY-di. “Qırmızı şeytanlar” ötənilki finalda MS-yə 2:1 hesabıyla qalib gəlmişdi. Onlar 1/8 finala qalmaqalla adladı. “Lester” üzərindəki qələbə lap sonda kobud hakim səhvi ilə müşayiət olundu. Ümumiyyətlə, bu oyun baxımlı keçmədi. Komandalar ləng hərəkət edir, təhlükəli vəziyyətlər yarada bilmirdi. Belə oyun fonunda hissənin sonunda qonaqlar hesabı açdı. “Lester”in bu qolunu məntiqsiz saymaq olmaz. MY fasilədən sonra taktiki dəyişikliklərə əl atdı. Və zamanla belə gedişlər işə yaradı. Təşəbbüsü ələ alan “Yunayted”, nəhayət, real təhlükələr yaratmağa başladı. Zirkzee 68-ci dəqiqədə hesabı bərabərləşdirə bildi.
Bununla belə, “tülkülər” uzun müddət təslim olmadı. Ta ki uzatma dəqiqələrində cərimə zərbəsi təyin olunana qədər. Düzdü, Maquayr qolu ofsayddan vurdu. Ancaq kubok oyunlarında VAR sistemi tətbiq olunmur. “Lester” taleyi ilə barışmağa məcburdu.
Mançesterin digər təmsilçisi də 2:1 hesabına sevindi. “Leyton Orient”lə səfər qarşılaşması “şəhərlilər” üçün uğursuz başladı. MS-nin yeni transferi Niko Qonsales mərkəzdə topu itirdi. “Leyton”un forvardı Donli mərkəz xəttinin yaxınlığından qapıya zərbə vurdu. Tirə dəyən top qapıçı Orteqaya toxundu və tora düşdü. Qvardiola fasilədən sonra oyunun axarına radikal müdaxilə etdi. Onun sonradan meydana buraxdığı oyunçulardan Xusanov hesabı bərabərləşdirdi, De Bruyne isə qələbə topunu vurdu.
Mançesterin iki klubu da kubok uğrunda mübarizəni davam etdirirsə, London bu imkandan məhrumdu. “Vulverhempton” və “Vest Hem” üzərindəki qələbələri “Çelsi”nin “sağalmasının” əlaməti sayanlar yanıldı. “Zadəganlar” növbəti məzmunsuz oyun keçirdi. Və oyunun əvvəlində “Brayton”un qapıçısı Verbrüggen aşkar kobud səhv üzündən topu öz qapısına salmasaydı, qonaqların hansısa hücum əməliyyatlarından danışa bilməzdik. “Brayton” tezliklə bu qolun əvəzini çıxdı.
Bundan sonra oyun daha sönük xarakter aldı. “Çelsi”nin bir təhlükəli vəziyyəti oldu, onda da Nkunku nə özü zərbə vurdu, nə də Palmerə yaxşı ötürmə verdi. Hissənin sonu toqquşmalar və zədələr ilə zəngin oldu. 2-ci hissənin əvvəlində “Brayton” irəli çıxdı. Bərabərlik qolunu vuran Rütter bu dəfə komanda yoldaşı Mitomaya assistentlik etdi. Ardından hesabı qorumaq üçün oynayan “Brayton” bunu bacardı. Mareskanın dəyişiklikləri oyunu gücləndirmədi, liderlər, xüsusən də Palmer hədsiz zəif təsir bağışladı. “Qağayılar” 1/8 finala adladı, “Çelsi”nin isə artıq bütün diqqətini çempionata yönəltməsi lazımdı.
Londonun digər nəhəngi “Tottenhem” də bu mərhələdə uğursuzluğa düçar oldu. Ciddi zədələrdən əziyyət çəkən “mahmızlar”ın “Aston Villa”nı yolundan kənarlaşdırmaq şansı onsuz da əvvəldən yüksək qiymətləndirilmirdi. Unay Emerinin komandası bu mövsüm daha yaxşı oyun sərgiləyir.
“Tottenhem”in az olan şansını Remzinin artıq 1-ci dəqiqədə vurduğu qol daha da azaltdı. Böyük üstünlüyü malik olan birmingemlilər uzun müddət 2-ci qolu vurmaqda çətinlik çəkdi. 2-ci hissənin ortalarında Rocers fərqlənməsəydi, Allah bilir bu oyun necə qurtaracaqdı. Emeridən fərqli Postekoğlunun meydana Asensio və ya Reşford səviyyəsində futbolçu buraxmaq imkanı yoxdu. “Bavariya”dan icarəyə götürülən Tel yalnız sonda qolla sözünü dedi ki, onda da artıq “qatar getmişdi”.
1/16 final
Plimut (D-2) – Liverpul 1:0
Hardi, 53-p.
Liverpul: Kelleher, Simikas, Endo, Kuansa, Qomes (Mabayya, 11/Nunyes, 58), Makkonnell, Nyoni (Doherti, 76), Dias, Elliott, Kyeza, Jota.
Mançester Yunayted – Lester 2:1
Zirkzee, 68. Maquayr, 90+3 – De Kordova-Rid, 42.
MY: Onana, Dalot, Mazraui, Maquayr, Yoro, Dorqu (Qarnaço, 46), Uqarte (Kazemiro, 90+4), Fernandeş, Dyallo, Maynu (Zirkzee, 64), Heylunn.
Leyton Orient (D-3) – Mançester Siti 1:2
Orteqa, 16-öz qapısına - Xusanov, 56. De Bruyne, 79.
MS: Orteqa, Lüis, Reys (Xusanov, 46), Diaş (Stounz, 46), O”Rayli (De Bruyne, 72), N.Qonsales (B.Silva, 22), Gündoğan, Savinyo, Makeyti (Foden, 72), Qriliş, Marmuş.
Brayton – Çelsi 2:1
Rütter, 12. Mitoma, 57 – Verbrüggen, 5-öz qapısına.
Çelsi: Sançes, Hüsto, Adarabioyo, Çaloba, Kukurelya, Kaysedo, Dyusberi-Holl (Fernandes, 58), Neto (Madueke, 74), Palmer, Sanço (Corc, 74), Nkunku.
Aston Villa – Tottenhem 2:1
Remzi, 1. Rocers, 64 – Tel, 90+1.
Tottenhem: Kinski, Porro, Danso, Qrey, Spens, Bentankur (Sarr, 73), Berqvall, Mur (Bissuma, 46), Kulusevski, Son Hın Min, Tel.
Everton – Bornmut 0:2
Semenio, 23-p. Cebbison, 43.
Birmingem (D-3) – Nyukasl 2:3
Layrd, 1. İvata, 40 – Uillok, 21; 82. Uilson, 26.
Koventri (D-2) – İpsviç 1:4
Latibyudir, 8 – Herst, 2-p. Klark, 28; 37. Filoden, 63.
Blekbern (D-2) – Vulverhempton 0:2
J.Qomes, 33. Kunya, 34.
Uiqan (D-3) – Fulhem 1:2
Smit, 50 – Muniz, 23; 55.
Sauthempton - Bernli (D-2) 0:1
Edvards, 77.
Stok Siti (D-2) - Kardiff (D-2) 3:3, p. – 2:4
Kumas, 42; 46. Beyker, 57-p. – Koulvill, 8; 68. Saleh, 19.
Lids (D-2) - Milluoll (D-2) 0:2
Əziz, 30; 55.
Preston (D-2) - Uikomb (D-3) 0:0, p. – 4:2
Donkaster (D-4) - Kristal Pelas 0:2
Munyos, 31. Devenni, 55.
Oyundan sonra
Entso Mareska, “Çelsi”nin baş məşqçisi:
“İngiltərə kubokundan uzaqlaşmaq biabırçılıqdı. Buna şübhə yoxdu. Nəsə müsbət məqam axtarırıqsa, indi biz premyer-liqa ilə Konfrans Liqasına köklənə bilərik. Komandamın həmin turnirlərdə yoluna davam edə biləcəyinə inanıram”.
Ruben Amorim, MY-nin baş məşqçisi:
“Biz sona qədər qələbəyə inanmalıydıq, ancaq bu oyunun Ferqi-taymla ortaq heç bir yönü yoxdu. Düşünürəm ki, həm topla, həm də topsuz daha yaxşı çıxış etməliyik. İkinci hissədə yaxşı, sürətli oynamağa başladıq, təkbətək mübarizələri qazandıq. Hadisələrin axarını dəyişə bildik. Odu ki, bu, yaxşı nəticədi, ancaq yaxşı oyun deyil”.
Xosep Qvardiola, MS-nin baş məşqçisi:
“Həqiqətən də yaxşı oyun göstərdik. Bu, İngiltərə kubokunun necə çətin olduğunu əyani şəkildə göstərən klassik oyun idi. Rəqibin boş zonalardan istifadə edəcəyini bilirdik. “Leyton” çox təşkilatlanmış komandadı, məşqçilərin böyük iş gördüyü bilinir. Ancaq biz də çoxlu qol vəziyyəti yaratdıq. Növbəti mərhələyə adladığımıza görə məmnunam”.
Arne Slot, “Liverpul”un baş məşqçisi:
“Heç şübhəsiz, bugünkü uğursuzluq bizə məyusluq və kədər bəxş etdi. Oyunumuzdan razı qala bilmərik - qətiyyən gözləntilərimizə uyğun deyildi. Uşaqlar son dəqiqəyə qədər mübarizə apardı, meydanda 100 dəqiqə fədakarlıq etdi, ancaq “Plumut” daha güclü oldu. Rəqibin dəqiq oyun planı var idi, mütəşəkkil təsir bağışladı, əsl fədakarlıq nümuməsi göstərdi. Penaltiyə gəlincə, heç bir sual olmamalıdı – hakimin qərarı tam doğru idi. Səhvlərimizi təhlil etməli, nəticə çıxarmalı və irəli baxmalıyıq”.
Digər xəbərlər
