Mövsümü istədiyi şəkildə keçirə bilməyən ''Fənərbaxça'' digər tərəfdən müqaviləsinin sonuncu ilində olan futbolçularla anlaşmaqda da çətinlik çəkir. Həm İrfan Can Kahveci, həm də Brayt Osayi-Samuel ilə bağlı tez-tez yeni iddialar ortaya atılır.

Onların hər ikisinin yeni müqavilə qarşılığında tələb etdiyi məbləğ rəhbərliyi qane etmir. 1,8 milyon avro qazanan Osayi-Samuel dördillik yeni müqavilə və illik 2,5 milyon avro maaş tələb edir. Rəhbərlik isə nigeriyalıya 2 milyon avrodan artıq ödəmək istəmir. Bu arada bu futbolçunun meneceri Stiven Bek rəhbərliklə son görüşdə ''Qalatasaray''dan təklif aldıqlarını vurğulayıb. O, ''Cim-Bom''un onların tələblərini qarşılamağa hazır olduğunu qeyd edib. Digər tərəfdən ''Qalatasaray'' cəbhəsi bir neçə dəfə qətiyyətli şəkildə İrfan Can ilə Osayi-Samuelə maraq göstərmədiklərini vurğulayıb. Ona görə də ''Fənər'' cəbhəsi bunun sadəcə menecerin oyunu olduğunu istisna etmir. Menecer əzəli rəqibin adından istifadə edərək daha çox pul ''qoparmağa'' çalışır.

Hərçənd Mişi Batşuayinin bu yay ''Fənər''dən ayrılaraq azad futbolçu statusunda ''Qalatasaray''a keçməsindən sonra hər şey mümkündü. 2021-dən ''sarı-lacivərdlilər''in şərəfini qoruyan və indiyə qədər 97 rəsmi oyuna çıxan 26 yaşlı Osayi-Samuel ən son ''Mançester Yunayted''lə oyunun ardından jurnalistlərin ''klubda qalacaqsanmı'' sualına ''bilmirəm, hər şey təkcə məndən asılı deyil'' cavabını vermişdi.

ƏLİ