Reynaldo, Vild-Donald Gerye, Şahruddin Məhəmmədəliyev, Riçard Almeyda, Patrik Andrade, Musa Qurbanlı...

“Qarabağ”dan gedən və “Qarabağ”a dönən futbolçuların heç də tam olmayan siyahısıdı. Gedənlərin əksəri dönəndən sonra ümidləri doğrultmadığına, bir daha əvvəlki səviyyəsinə yüksəlmədiyinə görə bu gün Kadi Borgesin növbəti gəlişi ağdamlıların azarkeşləri arasında heç də böyük sevinc doğurmayıb, daha doğrusu, sevinənlərlə məyus olanların sayı hardasa bərabərdi. Bu da dəlildi, amma mənim üçün mütləq həqiqət deyil. Ümumiyyətlə, oxucuma Kadinin dönüşünə yalnız yuxarıdakı siyahının “pəncərəsindən” yox, bir qədər geniş prizmadan baxmağı təklif edirəm. Odu ki, gəlin dostcasına bu suala cavab axtaraq: niyə məhz Kadi Borges?

Hələ sırf nəticələr baxımından nə dərəcədə effektli olacağına toxunmadan bu dönüşü “Qarabağ”ın kiçik qələbəsi sayıram. İlk növbədə ona görə ki, Ağdam klubu qəpik-quruşa aldığı vingeri “Krasnodar”a 5 milyon avroya satıb, indi də “Ferentsvaroş”a o qədər böyük pul ödəmədən qaytara bilib. Qələbənin ikinci əlamətini də deyim: ötən ilin iyulunda “Krasnodar”ın erməni sahibi Sergey Arutyunyan/Qalitski Kadini parladığı kluba yox, “Ferentsvaroş”a satmaqla bir növ “Qarabağ”dan qisas aldı. Bəlkə də erməni prezident braziliyalının ümidləri doğrultmamasına görə qəzəblənmişdi, bəlkə də ortada hansısa başqa səbəb var idi – indiki mənzərə belədi ki, inadkar “Qarabağ” ötən yay bacarmadığını bu dəfə bacardı.

Dostlar, bir halda ki, söhbətimiz alınır, başqa məqama da toxunaq. “Qarabağ” rəhbərliyi, özəlliklə də baş məşqçi Qurban Qurbanov nəticələrin get-gedə pisləşməsinin, çempionluq yolundakı əsas rəqiblərdən biri “Zirə”dən alınan acı məğlubiyyətin, mənəvi-psixoloji və oyun böhranının get-gedə uzanmasının, bu gedişlə tədricən çempionluğun taleyinin də sual altına düşəcəyinin fərqindədi. Xilaskar Juninyo yoxdu, heyətdəki dörd nominal forvardın (Cica, Addai, Qurbanlı, Axundzadə) heç biri braziliyalını əvəz edəcək, oyunu gözəlləşdirəcək, hücum əməliyyatlarını kreativləşdirəcək səviyyədə deyil. Əslində bu məqamda Qurban bəyin əlinin altında Juninyonu əvəzləyə biləcək üç-beş futbolçunun siyahısı olmalıydı, görünür, skautlar lazımi səviyyədə çalışmayıb. Yalandan “qış fasiləsində səviyyəli futbolçu tapmaq olmur” demək çıxış yolu deyil. Baş məşqçi tanımadığı Mister X əvəzinə tanıdığı Kadini seçməklə riskdən qaçır. Şəxsən mənim üçün bu seçimin başqa adı yoxdu.

“Tanıdığı Kadi” demişkən... Əslində hər birimiz onu yaxşı tanıyırıq. Yarımmüdafiənin hər iki cinahında, üstəlik hücumameyilli yarımmüdafiəçi mövqeyində oynayır, bu mənada universaldı. Öldürücü və gözlənilməz zərbələri var, yaşına baxsaq, tam çiçəklənən vaxtıdı. Yaradıcıdı, sürpriz qərarlar verir, kollektivdaxili mühiti korlayan adama oxşamır, indiki komanda yoldaşlarının əksəri ilə oynayıb və s. və i.a. Bəlkə də bəy tərifi kimi çıxır, amma mənə elə gəlir ki, Kadi nə “Qarabağ”da son sözünü deyib, nə də futbolda!

Son sözümü də deyim, sonra bu yazıya görə məni söyməkdə və ya sevməkdə azadsız: Kadi Yuri Borges Malinovskinin “Spartak”ın sabiq müdafiəçisi Georgi Cikiya ilə toqquşmada silkələnən beyni əvvəlki kimi işləyirsə, “Qarabağ”a və Qurban Qurbanova faydası dəyəcək. Mütləq və mütləq!

HUŞƏNG