Kadi Borges 5 milyon avro qarşılığında “Qarabağ”dan “Krasnodar”a transfer olundu.

Football-plus.az xəbər verir ki, bunu Ağdam təmsilçisinin bütün rəsmiləri açıqlamalarında, müsahibələrində təsdiqlədi. Lakin ruslar bununla razılaşmır.

Söhbət qonşu ölkənin mediasından gedir. Belə ki, rusiyalı həmkarlarımız hər vəchlə oyunçunun 2 milyon avroya satıldığını iddia edir. Həqiqətən belədi?

Məsələ ilə bağlı araşdırma apardıq. Əldə etdiyimiz məlumata görə, Kadi Borges Rusiya klubuna 5 milyon avroya satılmayıb. Ruslar ödənişi dollarla edib.

Lakin tam yox. İlkin olaraq 3 milyon dollar Ağdam təmsilçisinin hesabına köçürüləcək. Yayda isə məbləğin qalan hissəsi “köhlən atlar”a çatacaq.

Ruslar nə üçün 5 milyon söhbətinin üzərindən xətt çəkirlər? Bununla bağlı redaksiyamıza maraqlı informasiya daxil olub. “Krasnodar” rəhbərliyi məbləğ məsələsindən narahatdı. Çünki rusiyalı futbol veteranları Azərbaycan klubundan 5 milyonluq futbolçunun alınmasına görə klubu qınayır. “Krasnodar” rəhbərliyi də media vasitəsiylə ictimaiyyəti bu fikirdən yayındırır.

Həqiqəti isə biz dəfələrlə diqqətinizə çatdırmışıq. “Qarabağ” Kadi Borgesi 5 milyon dollar qarşılığında “Krasnodar”a satıb. Avropa futbolundan uzaqlaşdırılan ruslar, sadəcə, belə oyunlarla gündəmdə qalmaq istəyirlər.

İLKİN SULTANLI