Kriştiano Ronaldo Səudiyyə Ərəbistanı çempionatının 17-ci turunda “Əl-Nəssr”in “Əl-Fateh” üzərindəki qələbəsinə (3:1) yardım etdi. 39 yaşlı portuqaliyalı 3-cü qolu rəqib qapısından keçirdi, onun daha iki qolu ofsayd üzündən sayılmadı.

Kriştiano birinci dəfə 37-ci dəqiqədə fərqləndi. Anjelonun cinah ötürməsindən sonra dəqiq baş zərbəsi vurdu, ancaq hakimlər ofsayd qərarı verdi. Fasilədən sonra da bir topu tirdən döndü.

Kriş qaydalar çərçivəsində yalnız 87-ci dəqiqədə fərqləndi, onda “Əl-Nəssr” 2:1 öndə idi. Penaltidən fərqlənən portuqaliyalı uzatma dəqiqələrində qəzəbdən yerə-göyə sığmırdı, axı həmin vaxt daha bir qolu ofsayd üzündən sayılmadı. Əslində ofsayda onun komanda yoldaşı düşmüşdü, daha doğrusu, teletəkrarda bu, yetərincə mübahisəli qərar kimi göründü. Final fitindən sonra portuqaliyalı qəzəbini kameralardan gizlətmədi.

Kriştianonun qəzəbi meydandan kənarda mülayimliklə əvəz olundu – paltardəyişmə otağından çıxışda onu köhnə tanışı, Səudiyyə Ərəbistanına ilk dəfə təşrif buyuran Pirs Morqan gözləyirdi. Ronaldo 2022-ci ilin noyabrında “Mançester Yunayted”lə müqaviləsini pozmasına səbəb olan qalmaqallı müsahibəni məhz ona vermişdi. Dostlar qucaqlaşdı, mehribancasına danışdı, Morqan ardından sosial şəbəkədə portuqaliyalının təmiz qolunun “oğurlandığını” yazdı:

Yanvarın 30-da isə Səudiyyə Ərəbistanı çempionatında 18-ci tur start götürdü. “Əl-Nəssr” səfərdə “Əl-Rid”i 2:1 hesabıyla məğlub etdi və Kriştiano meydandan yenə qolla ayrıldı. Ümumiyyətlə, portuqaliyalı əla forma yığıb – klubun və yığmanın heyətində keçirdiyi son 10 oyunda 13 qol vurub, eləcə də çempionatda 15 qolla bombardirlər yarışına başçılıq edir. Onun ən yaxın izləyicilərinin – Benzemanın hesabında 13, Mitroviçin hesabında 12 qol var. Düzdü, “Əl-Nəssr” çempionluq yarışında bu futbolçuların komandalarından geri qalır. Hazırda 3-cü pillədə qərarlaşan “Əl-Nəssr” “Əl-Hilal”la “Əl-İttihad”ın hər birindən 5 xal geridədi.

“Əl-Rid”in qapısından keçirdiyi top Kriştianonun karyerasına 921-ci qol kimi yazıldı – çox arzuladığı 1000-ci qola cəmi 79 “addım” qaldı. Portuqaliyalı “Əl-Nəssr”in heyətində keçirdiyi 88 oyunda 98 (79+19) məhsuldar hərəkətlə yadda qalıb. Cari mövsümdə bütün turnirlərdə keçirdiyi 24 oyunda 21 qol vurub.