“Turan Tovuz”un İdarə Heyətinin sədri Ehtiram Quliyevin "Football-plus.az"a müsahibəsi

- Komandanız "Qarabağ"la oyunda geridödüş etdi. Bununla bağlı təəssüratınız necədi? 
- Ən vacibi, bizi sevindirən odu ki, gözəl oyun oldu. Təbii ki, qələbəyə həmişə sevinirik. “Qarabağ” kimi böyük komandadan alınan hər xal bizi xoşbəxt eləməyə bilməz. Azarkeşlərimizə təşəkkür edirik. Onlar göstərdilər ki, “Turan Tovuz”un təkcə yaxşı yox, həm də pis günündə də yanında ola bilirlər.

- Bu mövsüm “Qarabağ”ın məğlub edə bilmədiyi yeganə komandasız. “Qarabağ”a qarşı xüsusi hazırlaşırsız? 
- Xeyr. “Qarabağ” böyük komandadı. Çempionatımızdakı hər bir komanda “Qarabağ”a qarşı xüsusi motivasiya ilə oynayır. O cümlədən də biz. Xüsusi bir hazırlığımız yoxdu. Belə nəsib olur.

- “Qarabağ” üzərində qələbələr klub rəhbəri kimi sizin özünüzün gələcəklə bağlı motivasiyanıza necə təsir edir?
- Azərbaycan futbolunda “Qarabağ”ın rolu misilsizdi. Bu qələbələrimiz çempionatın maraqlı olmasına gətirib çıxarır. Bu məğlubiyyətlər “Qarabağ”ın özünə də faydalıdı. Rəqabət artdıqca keyfiyyətli iş əmsalı ortaya çıxır.

- “Turan Tovuz” “Kəpəz”ə uduzur, sonra “Qarabağ”a qalib gəlir. Çempionatın səviyyəsini necə dəyərləndirirsiz?
- Çempionatda artıq autsayder yoxdu. Hər komanda ciddi rəqibdi. Bunu görürük. İldən-ilə çempionatımızda baxımlılıq artır. Bunun üçün təşkilatçılara, PFL-ə və AFFA-ya təşəkkürümü bildirirəm. Xüsusən də qeyd etməliyəm ki, hakimlər komitəsindəki dəyişiklik çempionatımıza müsbət yanaşıb. Bizi gözəl günlər gözləyir.

- Legioner limitinin ləğvi ilə bağlı fikirləriniz necədi? 
- Tam mövqe sərgiləmək yanlış olardı. Çünki mən limitin ləğvini elə əsaslandıraram ki, hamı bunu dəstəkləyər. Əsaslı səbəblər var. Yaxud da əksinə. Ləğv olunmamasını də eyni cür əsaslandıra bilərəm. Biz, sadəcə, müddətə etiraz edirik. Çünki uzunmüddətli müqavilələrimiz var. Lakin qərar qəbul olunsa, ayaq uyduracağıq.

- İlyarımdı AFFA “Turan Tovuz”un stadionunun ot örtüyünün dəyişdirilməsi üçün vəsait ayırmır. Hansısa dəyişiklik varmı? 
- Bizim onların səmimiyyətinə qətiyyən şübhəmiz yoxdu. Həqiqətən də büdcədə bunun üçün vəsait yoxdu. Lakin müzakirə gedir. Biz bu məsələni ona görə gündəmdə saxlayırıq ki, sabah maliyyə olarsa, ilk bu məsələ həll olunsun. Çünki biz bu işə öz nöqteyi-nəzərimizdən yox, futbolumuzun inkişafı baxımından baxırıq. Gələcəkdə ortaq bir yol tapıb, gedəcəyik. 

- Ot örtüyünün dəyişdirilməsi ilə bağlı planınız necədi? 
- Martdan tez düşünə bilmərik. Həmin vaxt klubun İdarə Heyətinin toplantısı olacaq və orda qərar veriləcək ki, qazonu nə vaxt dəyişririk.

ƏSƏD SEYİDOV