Bundesliqanın 17-ci turunda Dortmund ''Borussiya''sı debütant ''Holştayn''ın qonağı oldu.

Mövsümü yaxşı keçirməyən Nuri Şahinin komandası aşkar favorit sayıldığı qarşılaşmada yenə ümidləri doğrulda bilmədi.

''Football-plus.az'' xəbər verir ki, bu oyuna qədər cəmi 2 qələbəsi olan və düşmə zonasında qərarlaşan ''Holştayn'' fasiləyə qədər 3 cavabsız qol vurmaqla hər kəsi təəccübləndirdi. Tarixində ilk dəfə elitada oynayan ''Holştayn'' yekunda 4:2 hesablı inamlı qələbə qazandı. ''Borussiya'' ilk dövrəni 25 xalla 10-cu pillədə tamamladı! Bu, komandanın son 10 ildəki ən zəif performansıdı. ''Arılar'' sonuncu dəfə 2014/15-də 17-ci turu indikindən daha az (15) xalla başa vurmuşdular.

Çempionlar Liqasının son finalçısı statusunda olan Dortmund təmsilçisinin bundesliqanın son 6 turunda cəmi 1 qələbəsi var (3 heç-heçə, 2 məğlubiyyət). Komanda bu mövsüm daxili çempionatda 8-ci səfər oyununda 5-ci dəfə məğlub oldu. Neçə müddətdi, istefası gündəmdə olan Nuri Şahinin son fiaskonun ardından işini itirəcəyi gözlənilir. Hətta türkiyəlinin yerini tutmağa əsas namizədin adı da bəllidi.

Bu, bir neçə ay öncə ''Mançester Yunayted''dən qovulan Erik ten Haqdı. Niderlandlı mütəxəssis ötən cümə günü ''Borussiya''nın evdə ''Bayer-04''ə qarşı keçirdiyi oyunu tribunadan izləmişdi.

ƏLİ