Dortmund ''Borussiya''sı bundesliqada Nuri Şahinin başçılığı altında qəribə və qeyri-sabit qrafik cızmaqda davam edir.

Komanda heç cür səfər oyunlarında qalib gələ bilmir. ''Arılar'' bu həftə 13-cü tur çərçivəsində Münhenqladbax ''Borussiya''sının qonağı oldular. Son həftələrin yüksələn ismi Ceymi Gittens 65-ci dəqiqədə Dortmund klubunu hesabda önə keçirsə də, meydan sahiblərinin heyətində Kevin Ştöger 71-ci dəqiqədə penaltini dəqiq yerinə yetirməklə yekun nəticəni müəyyənləşdirdi. ''Borussiya'' bu mövsüm bundesliqada 6-cı səfər oyununda da qələbəyə həsrət qaldı (2 heç-heçə, 4 məğlubiyyət). Ancaq komandanın bu sindromu yalnız daxili turnirlərdə mövcuddu.

Ötən ay ''Borussiya'' səfərdə ''Volfsburq''a da uduzmaqla ölkə kubokunda mübarizəni 1/16 final mərhələsində dayandırmalı olmuşdu. Çempionlar Liqasında isə durum fərqlidi. ''Borussiya'' gənc türkiyəli məşqçi ilə bu turnirdə keçirdiyi 3 səfər oyununun 2-də qalib gəlib və yalnız ''Bernabeu''da ''Real''a uduzub.

Əvəzində Nuri Şahinin komandası ev oyunlarında çox inamlı təsir bağışlayır. ''Borussiya'' bu mövsüm evdə keçirdiyi 9 rəsmi oyundan 8 qələbə, 1 heç-heçə ilə ayrılıb. 13 tura 21 xal toplayan ''sarı-qaralar'' lider ''Bavariya''dan 12 xal geridədilər.

ƏLİ