“Qarabağ” Juninyonun sabiq klubuna 750 min avro ödəyə bilər – klub rəsmisi açıqladı
Məlum olduğu kimi, Juninyo artıq Braziliyadadı. “Qarabağ”ın dünən Bakıdan ayrılan hücumçusunu Rio de Janeyroda klub nümayəndələri, jurnalistlər və bir qrup azarkeş qarşılayıb. Onun tezliklə “Flamenqo”yla müqavilə imzalayacağı gözlənilir.
Bu ərəfədə keçidlə bağlı diqqətçəkən məlumat üzə çıxıb. Məlum olub ki, braziliyalını 5 milyon avroya satan “köhlən atlar” həmin vəsaitin hamısını büdcəsinə əlavə edə bilməyəcək. Ona görə ki, ağdamlılar Juninyonu Portuqaliya “Şaviş”indən alarkən növbəti satışdan qazanılacaq pulun 15 faizini bu kluba ödəyəcəyiylə bağlı razılığa gəlib. Bu da 750 min avro deməkdi. Yəni “Qarabağ” Juninyonun satışından cəmi 4 milyon 250 min avro qazanacaq.
“Football-plus.az” mövzuyla bağlı “Qarabağ”ın İdarə Heyətinin üzvü Asif Əsgərovun fikirlərini öyrəndi:
“Hansısa futbolçunun transferi zamanı əvvəlki klubuna sabit məbləğlə yanaşı, növbəti satışından əldə olunan vəsaitin müəyyən faizinin ödənilməsi normaldı. Belə hallar danışıqların bir hissəsidi. İndi dəqiq rəqəmlər haqda danışmaq olmaz. Bu, məxfi məsələdi. Yalnız transfer rəsmiləşəndən sonra nəsə demək uyğun olar”.
KƏNAN BAHADIR
Digər xəbərlər
