“Latsio” fanatları məni, mən də onları dəlicəsinə sevirdim. Amma ayrılıq zamanının gəldiyini anlamışdım. Yeganə peşmanlığım fanatlarla istədiyim şəkildə vidalaşa bilməməyimlə bağlıdı. Sarri “Latsio”dan ayrılandan sonra çox çətin bir dönəmdən keçdim. Kapitan olaraq, üzərimə fərqli məsuliyyətlər düşdü. Bunlara tam hazır deyildim. Ona görə də 8 ilin ardından böyük bir bataqlığın içinə düşdüm. Futbolçu psixoloji cəhətdən qaydasında deyilsə, belə desək, ağlı başında deyilsə, zədələnməyə başlayır. Mən də məhz bunu yaşadım. Bütün bunlara görə ayrılmağa qərar verdim. Türkiyə macərama böyük ümidlərlə yollandım. Çox həvəsliydim. Hər insanın həyatında bəzən dəyişikliyə ehtiyac olur. Mən bu reallığı qəbul etməyi sevirəm. Amma eyni zamanda “Latsio”da keçirdiyim 8 gözəl mövsümün ardından dəyişikliyə getmək məni bir qədər qorxudurdu. Bununla belə, bu cür dəyişiklik edən hər kəs kimi mən də o coşquya sahib idim. Çünki hər şeyə yenidən başlamaq, qarşıma yeni hədəflər qoymaq istəyirdim. Ailəmi İtaliyada qoyub gəlmək məcburiyyətində qaldığıma görə üzgünəm. Amma bu cür yeni bir meydan oxumaya ehtiyacım var idi. İlk oyunumda iki qol vurdum, matçın ən yaxşısı seçildim və superkuboku qazandıq. Bütün bunlar mənə əlavə güc verdi. Mavi rəngdən ağ-qara rənglərə keçmək mənim üçün özəl bir durum oldu. Amma xoşuma gəldi. “Latsio” fanatları məni bundan sonrası üçün yox, keçmişdə bu klub üçün etdiklərimə görə sevirdi. Bu, məni bir qədər üzürdü. Mənim üçün uzun illər sabit oynayan futbolçular həmişə dəyərli olub. Artıq Türkiyədəyəm və özümü əla hiss edirəm. Bütün stadion məni bağrına basdı. “Beşiktaş” fanatları həqiqətən də möhtəşəmdi. Türkiyə çempionatının səviyyəsi yaxşıdı. Ötən mövsüm iki komanda sona qədər çempionluq uğrunda mübarizə apardı. Mən bura sevdiyim işdən zövq almağa və əylənməyə gəlmişəm. Amma əyləncə yalnız qalib gəldiyin zaman olur. Bundan əvvəl iki dəfə legioner həyatı yaşamışdım. İndi yaşadıqlarım əvvəlkilərdən fərqlənir. Çünki daha təcrübəliyəm. Meydanda da bunu göstərirəm. Bu baxımdan heç bir problem yaşamıram. Mən həmişə üzərimdə çalışmağı sevənlərdən olmuşam. Karyeramı bu özəlliyimin üzərində inşa etmişəm. A seriyasında 200-dən çox qol vurmuşam. “Qızıl buts” mükafatını, eləcə də Avropa çempionluğunu qazanmışam. Bunlar az deyil. Amma hələ də futbola verə biləcəyim şeylər olduğunu düşünürəm. Tənqidlər həmişə olur və bunlara fikir verməməyə çalışıram. Yığmanın heyətində daha çox tənqid olunmuşam. Amma bəlkə də özümü bu tənqidlərdən kənar tutmağı bacardığım üçün yaxşı bir Avropa çempionatı keçirdim. Mərkəz hücumçusu kimi AÇ qazanan son futbolçuyam”.