“Liverpul”u indiki məqamda Avropanın ən güclü komandası adlandırmaq olar. Arne Slotun komandasının yalnız üç heç-heçəsi və “Nottingem Forest”dən aldığı gözlənilməz məğlubiyyət var.

"Football-plus.az" xəbər verir ki, qalan bütün oyunlar isə mersisaydlıların inamlı qələbəsiylə bitib.

Bəs yeni baş məşqçi “Liverpul”u birdən-birə necə titula əsas iddiaçıya çevirdi? Bunun bir neçə səbəbi var.

Salah ikinci gəncliyini yaşayır
Məhəmməd Salah yenə “od götürüb”. Hər mövsümü yetərincə parlaq keçirən misirli yeni baş məşqçinin dönəmində bir qədər də qol-qanad açıb. Konkret rəqəmlərə baxaq: Salah premyer-liqanın ötən mövsümündə 18 qol vurmuş, 10 məhsuldar ötürmə vermişdi. Cari mövsümdə isə artıq 16 qolu və 11 ötürməsi var. Cəmi yarım il ərzində!

Salah hələ 1-ci turun “İpsviç”lə oyunundan sonra belə demişdi:

Uzun müddət öyrəşmək lazım gəlmədi – misirli yenidən çempionatın bombardirləri sırasındadı. Yeni rol forvarda rəqib qapısına mümkün qədər yaxın məsafədə topu qəbul etməyə və hücumları bitirməyə yardım edir. Elə kombinasiyalı oyunda da əvvəlkindən yaxşı təsir bağışlayır – artıq ötən mövsümdəkindən daha çox məhsuldar ötürmə verib.

Qravenberxin “çiçək açması”
“Liverpul” yayda Martin Subimendinin şəxsində yaxşı dayaq yarımmüdafiəçisini transfer etmək imkanını qaçırdı. Slotun sistemində texnikalı yarımmüdafiəçinin olması vacibdi, ancaq “Liverpul” qəfil mövsümə bu mövqeyə transfer etmədən başlamağa qərar verdi. Sən demə, yeni baş məşqçinin dahiyanə planı var imiş.

Vakant yeri Rayan Qravenberx tutdu – niderlandlını hələ ötən il “Bavariya”dan almışdılar, ancaq Almaniyada olduğu kimi, İngiltərədə də vaxtının böyük hissəsini ehtiyat oyunçular skamyasında keçirirdi. Slot ona özünü göstərmək şansı verdi – belə aydın oldu ki, futbolçu müdafiəyə yaxşı yardım etməklə yanaşı, topu da irəli daşıya bilir:

Taktiki çeviklik
Açıq-aşkar demək lazımdı ki, Arne Slot Yürgen Kloppun son illərdəki “Liverpul”u ilə müqayisədə oyundakı taktiki dəyişikliklərə daha sürətli və incə reaksiya verur. O, vaxtında əvəzləmələrə əl atır, işlər qaydasında getməyəndə oyun planını dəyişməyi ləngitmir.
Məsələn, “Milan”la Çempionlar Liqasının oyununun fasiləsində Slot Aleksander-Arnolddan Rafael Leao ilə mübarizə aparmamağı, daha “yuxarı qalxmağı” xahiş etdi. Mo Salah isə öz növbəsində daha fəal şəkildə Teo Ernandesin arxasına sıçramalıydı. Bu riskli gediş olsa da, özünü doğrultdu: “Liverpul” hücumda təhlükəli oldu, demək olar ki, sərbəst qalan Leaonu isə Co Qomes tam neytrallaşdırdı.

Kloppu elə “Liverpul” azarkeşləri tez-tez ona görə tənqid edirdilər ki, artıq qalib gəldikləri oyunlarda ulduz oyunçuları meydandan çıxarmır, yaxşı oyun göstərməyənləru də uzun müddət meydanda saxlayır. Belə tənqidlərdə həqiqət payı var – indi Slot öz nümunəsi əsasında sübut edir ki, mikromenecment daha sürətli həyata keçirilməlidi.

Zədəlilərin yoxluğu
İstənilən komandanın uğuru üçün az qala əsas amildi. Həqiqətən “Liverpul”un zədələrlə bağlı bəxti gətirir - əsas heyət oyunçularından yalnız qapıçı Alissonla müdafiəçi Konate uzun müddətə sıradan çıxıb. Hə, başqa futbolçuların da fərqli zədələri olub, ancaq onlar tez sıraya dönüb, yoxluqları ciddi şəkildə duyulmayıb. Əvvəlki illərlə müqayisə edin – “Liverpul” müntəzəm şəkildə bir neçə aparıcı oyunçusunu itirir, hədəflərindən uzaq düşürdü. Biabırçı 2022/23 mövsümünü xatırlayın – güclü heyət fonunda zədələrdən ciddi əziyyət çəkən komanda mövsümü 5-ci yerdə bitirdi.

Klopp gedişi üçün zəmin hazırlamışdı
Bir neçə il əvvəl ser Aleks Ferqyuson səhlənkarlıq göstərdi, sonradan bunu Arsen Venger də təkrarladı. Bu dahilərdən heç biri təqaüdə çıxmağa hazırlaşmamışdı – klublarını elə məqamda atdılar ki, onlar artıq gəncləşməyə və yeni nəslin hazırlanmasına ehtiyac duyurdu.
Klopp daha müdrik hərəkət etdi – növbəti məşqçi üçün perspektivli və təcrübəli oyunçuların sintezindən ibarət yaxşı irs qoydu. Ümumiyyətlə, bu, istənilən komanda üçün vacib amildi. Yaşlı liderlərlə istedadlı gənclər bir-birinə üzvi surətdə qarışmalıdı. Kloppun gedişindən sonra yalnız bir problem var: üç superulduzun müqavilə müddəti bitir. Bunlar Salah, Aleksander-Arnold və Van Diykdi. Klub yayda azad agentə çevriləcək futbolçularla bağlı tezliklə hansısa addım atmalıdı.