Türkiyə çempionatında məşqçi istefalarının ardı-arası kəsilmir.

Nuri Şahinin ''Antalyaspor''dan ayrılıb Dortmunda yollanmasının ardından bu dəfə ''Sivasspor''dan istefa xəbəri gəldi.

"Football-plus.az" xəbər verir ki, Sərvət Çətin sosial şəbəkədə etdiyi paylaşım ilə Sivas təmsilçisindən ayrıldığını açıqlayıb.

Bu, onun müstəqil məşqçi kimi ilk təcrübəsi idi. Daha öncə köməkçi qismində ''Trabzonspor'' və ''Konyaspor''da çalışan Çətin 2019-dan bu yana ''Sivasspor''da Rza Çalımbayın köməkçisi idi. Bu yay Çalımbay ayrıldıqdan sonra baş məşqçi postuna məhz Çətin gətirilmişdi. Amma göründüyü kimi 42 yaşlı mütəxəssisin baş məşqçi kimi ilk klubunda macərası cəmi 6 ay çəkdi. ''Yiğidolar'' bu məşqçi ilə keçirdikləri 19 rəsmi oyundan 7 qələbə, 6 heç-heçə, 6 məğlubiyyətlə ayrılmış oldular.

İddialara görə Çətini ''Sivasspor'' tarixində xüsusi yeri olan Bülənt Uyğun əvəzləyəcək. Təcrübəli mütəxəssis ən son 2021-ci ildə ''Çaykur Rizəspor''u çalışdırıb və artıq 2 ildən çoxdu, işsizdi. Onu da bildirək ki, Sərvət Çətinin ayrılması ilə birlikdə bu mövsüm superliqada ən azı bir dəfə məşqçi dəyişikliyinə gedən klubların sayı 16-ya çatdı! Yəni elitada çıxış 20 klubdan cəmi 4-ü - ''Qalatasaray'', ''Fənərbaxça'', ''Hatayspor'' və ''Çaykur Rizəspor'' mövsümə başladıqları məşqçi ilə yola davam edirlər.

ƏLİ