AFFA İngiltərə klublarının oyunçularını “milliləşdirəcək”?
Son günlər Azərbaycan yığması ilə bağlı maraqlı xəbərlər yayılmaqdı.
Belə ki, Türkiyə mediasının (gettosport) iddiasına görə, “Sanderlend”in 22 yaşlı sol cinah müdafiəçisi Dennis Sirkin millinin idman direktoru İlqar Qurbanovun təşəbbüsü ilə yaxın gələcəkdə Azərbaycan vətəndaşlığı ala bilər. Nəşr artıq AFFA-nın bu yöndə lazımi işləmlərə başladığını yazır. “Tottenhem”in yetirməsi olan, hazırda çempionşip klubu “Sanderlend”də çıxış edən futbolçu hələ karyerasının əvvəlindədi. Həm də İngiltərə U-21 yığmasının şərəfini qoruyan Dennisin Azərbaycanla hansısa bağlılığı yoxdu.
Həmçinin İlqar Qurbanovun yığmaya Sirkinlə bərabər “Midlsbro” formasını geyən Dan Barlaseri də qazandıracağı deyilir. 27 yaşlı futbolçu 6 nömrə mövqeyində çıxış edir.
Maraqlıdı, AFFA doğrudanmı hansısa futbolçuları “milliləşdirməyə” çalışır? AFFA-nın Mətbuat və İctimaiyyətlə Əlaqələr Departamentinin rəhbəri Elnur Məmmədlinin “Football-plus.az”a cavabı belə oldu:
“Yazılanlar həqiqəti əks etdirmir. Bu futbolçuların adlarını yeni eşitdik. Onların Azərbaycan milli komandasına cəlb edilməsi ilə bağlı heç bir danışıq aparılmayıb”.
RÖYANƏ OĞUZ
