“Mançester Yunayted”də Markus Reşfordun durumu müzakirə mövzusu olmaqda davam edir.

Ruben Amorimin qərarı ilə bir andaca “qara siyahı”ya salınan ingiltərəli ulduz zədəli olmamasına rəğmən, son 4 rəsmi oyunun heç birində iştirak ərizəsinə düşməyib. 27 yaşlı futbolçu ilə bağlı tez-tez yeni iddialar ortaya atılır.

Ən son iddiaya görə “qırmızı şeytanlar” Reşfordu “Yuventus”a təklif edib. Turin nəhəngi düşünmək üçün vaxt istəsə də, məlum olub ki, baş məşqçi Tyaqo Motta Reşfordun yox, daha çox “Yunayted”in digər üzvü Coşua Zirkzeenin xidmətində maraqlıdı. Bu ikili bir-birini gözəl tanıyır. Çünki niderlandlı Zirkzeenin ötən mövsüm “Bolonya”da məhz Mottanın başçılığı altında ulduzu parlamışdı. Bundan başqa, məlum olub ki, “Yunayted” Reşfordu 60 milyon avrodan aşağı qiymətə satmaq niyyətinə deyil. Hazırda ona maraq göstərən klublar arasında “Barselona”, “Napoli”, PSJ, “Əl-Nəssr”, “Əl-Qədisiyə”nin adı çəkilir. “Bavariya” ilə “Tottenhem” də bu futbolçunun xidmətində maraqlıdı. Amma bu iki klub maaşının bir hissəsinin “Yunayted” tərəfindən ödənilməsi şərti ilə Reşfordu yalnız icarəyə götürmək istəyir.

Mankunianların heyətində 10-cu mövsümünü keçirən Reşfordun bu mövsüm 23 rəsmi oyunda iştirak etdiyini və 7 qol vurduğunu bildirək.

ƏLİ