Dekabrın 1-də “Mançester Yunayted” Ruben Amorimin başçılığı altında premyer-liqada ilk ev oyununda “Everton”u 4:0 hesabı ilə darmadağın etdi. Əsas heyətdə meydana çıxan Markus Reşford hesabına iki qol yazdı.

Həmin an düşünmək olardı ki, istedadlı futbolçunun işləri bu məşqçinin dönəmində düzələcək və “Yunayted” fanatları əvvəlki Reşfordu izləyə biləcək. Amma o tarixdən cəmi bir neçə həftə ötüb. Və indi artıq əminliklə demək olar ki, Reşford yolun sonuna çatıb. Böyük ehtimalla o artıq bu qış transfrer dönəmində komandanı tərk edəcək.

Amorimin qərarı
Hər şey bir andaca dəyişdi. Dekabrın 15-də “Mançester Siti”yə qarşı səfər derbisində nə Reşfordun adı iştirak ərizəsinə düşdü, nə də Alexandro Qarnaçonun. Halbuki onların heç bir zədəsi və ya cəzası yox idi. Amorim onların olmamasının konkret səbəbini söyləmədi. Amma portuqaliyalının “mən hər şeyə - futbolçunun nəinki məşq performansına, həttta nə yediyinə və geydiyinə də fikir verirəm” açıqlaması sanki bir ipucu oldu. Hərçənd həmin matçdan sonra Amorim Reşfordun heç bir intizamsızlığa yol vermədiyini də qeyd etdi. Elə həmin həftəsonu “Qardian” iddia etdi ki, Amorim və klubun sahibi Cim Retkliffin birlikdə qəbul etdiyi qərara əsasən Reşford transferə çıxarılacaq.

Maraqlıdı ki, klubun öz yetirməsi olan və “Yunayted”də 10-cu mövsümünü keçirən 27 yaşlı vinger bu xəbəri çox sakit, hətta soyuqqanlı qarşıladı. Üstəlik mətbuata açıqlama da verərək yeni çağırışa hazır olduğuna işarə vurdu. Görünür, o özü də artıq taleyi ilə barışıb və “Yunayted”də ona yer olmadığını anlayıb. Amorim onun sözlərinə cavab olaraq “futbolçu belə açıqlama verməmiş məşqçi ilə söhbət etməlidi” ifadəsini işlətdi və... Reşfordu növbəyi oyunlarda da iştirak ərizəsinə salmadı! “Yunayted” onsuz əvvəlcə Liqa kubokunda “Tottenhem”ə 3:4 uduzaraq mübarizəni dayandırdısa, ötən bazar günü evdə “Bornmut” önündə darmadağın oldu (0:3).

Digər tərəfdən son iki qarşılaşmanın hər birində Qarnaço iştirak ərizəsinə düşdü, üstəlik sonradan meydana daxil olaraq oynamaq şansı da qazandı. Belə çıxır ki, Amorimin problemi konkret Reşfordladı. Hələ ki ona bəslənən ümidləri doğrultmayan 39 yaşlı çalışdırıcı “Bornmut”la matçdan sonra da Reşford haqda sualla üzləşdi və onun cavabı belə oldu:

Ən real variant Səudiyyə Ərəbistanıdı
Amma məsələ burasındadı ki, Reşford üçün yeni klub tapmaq çox çətin olacaq. İngiltərədən kənarda Avropanın heç bir top klubu ona maraq göstərmir. Həm də “Yunayted”lə 2028-ə qədər müqaviləsi olan təcrübəli futbolçunun həftəlik maaşı 365 min funt sterlinqdi! Bəzi mənbələr bu məbləğin 300 min funt sterlinqə bərabər olduğunu iddia edir. İstənilən halda, həm birinci, həm də ikinci variantda Reşford hazırda premyer-liqanın ən çox qazanan 5 futbolçusundan biridi! Ortaya sual çıxır ki, komandanın əsas üzvü sayılmayan bir futbolçuya nə üçün bu qədər maaş verilir? Bir çox ölkələrdə yerli futbolçulara həmişə xüsusi dəyər verilir və İngiltərə də bunların başında gəlir. Üstəlik nəzərə alaq ki, Reşford həm də uzun müddət yığma üzvü olub. O ilk müqaviləsini 2020-yə, ikinci müqaviləsini 2023-ə qədər imzalamışdısa, sonra bunu 2028-ə qədər yenilədi. Hər dəfə də onun maaşı artırılırdı. Bu, yeni müqavilə imzalanan zaman standart praktikadı. Əslində 2023-ün əvvəllərində Reşford sanki ikinci gəncliyini yaşayırdı. Həmin dönəmdə 15 qarşılaşmada 13 qol, 4 məhsuldar ötürməlik performans sərgiləyən “Yunayted”in ulduzu hətta Holann, Osimhen və Mbappedən də məhsuldar oynayırdı. Ona görə də 2023-ün yayında onunla yeni beşillik müqavilə imzalanarkən heç kim buna təəccüblənmədi. Reşford həm də son illərdə İngiltərədə imicini xeyli yüksəldib. Pandemiya dönəmində məktəblilərə pulsuz yemək paylanılması üçün 20 milyon avro toplayan, dəfələrlə xeyriyyəçiliklə məşğul olan, yoxsulluq içində yaşayan uşaqların problemlərini qabardan Reşford həm də Britaniya İmperiyası Ordeninin üzvü seçilib. Yerli universitetlərin birində doktorluq dərəcəsi də alıb. Onun ətrafında bir neçə fond birləşib və ölkənin öndə gələn siyasətçiləri də tez-tez onun haqda danışır.

Qısası, media sahəsindəki Reşford artıq futbolçu Reşfordu üstələyib. Bu baxımdan onu Devid Bekhemə bənzədənlər də az deyil. Amma bu ilin əvvəllərində Reşford Belfastda gecə klubunda səhərə kimi əyləndikdən və komandasının məşqini buraxdıqdan sonra onun nüfuzuna bir qədər xələl gəlmişdi. “Yunayted” onu 764 min funt sterlinq cərimələmişdi. Bu mövsüm bu futbolçu 19-u start heyətində olmaqla 24 rəsmi oyunda forma geyib və 7 qol, 3 məhsuldar ötürmə ilə fərqlənib. Reşforda “Çelsi” və “Arsenal” maraq göstərir. Aydın məsələdi ki, onun böyük qazancını ya İngiltərə nəhəngləri, ya da Səudiyyə Ərəbistanı klubları qarşılaya bilər. Amma “Yunayted” rəhbərliyi öz yetirməsinin prinsipial rəqiblərdən birinə yollanmasını istəmir. Ona görə də hələ ki ən real variant Səudiyyə Ərəbistanıdı. Ayrılıq iddiaları ortaya atılan kimi “Əl-İttihad”, “Əl-Nəssr”, “Əl-Hilal” və “Əl-Əhli” Reşforda maraq göstərməyə başladı. “Əl-Nəssr” Anderson Talişkanı “Fənərbaxça”ya göndərmək üzrədi və yaxşı bir hücum oyunçusuna ehtiyac duyur. Ona görə də Ər-Riyad təmsilçisinin daha çox canfəşanlıq göstərəcəyini güman etmək olar. Kriştiano Ronaldonu “Yunayted”dən gözəl tanıyan Reşford bu dəfə portuqaliyalı superulduzla “Əl-Nəssr”də birləşə bilər.

ƏLİ RAUFOĞLU hazırladı