Gözlənildiyi kimi, Tyaqo Motta “Bolonya”nı yayda tərk edəcək. Amma o, məşqçilik fəaliyyətini İtaliyada davam etdirəcək.

Bu mövsüm “Bolonya”nın baş məşqçi vəzifəsində uğurlu nəticələrə nail olan Tyaqo Motta gələn mövsüm “Yuventus”u çalışdıracaq. Bu barədə Nikolo Skira məlumat yayıb. Məşhur jurnalist 41 yaşlı mütəxəssisin daha bir mövsümlük yeniləmək ehtimalı ilə müddəti 2026-cı ilə qədər nəzərdə tutulan müqavilə imzalayacağını xəbər verib.

İtaliya yığmasının sabiq yarımmüdafiəçisi olan Tyaqo Motta 2022-ci ilin sentyabrından “Bolonya”nın baş məşqçisidi. Onun komandası 34 turdan sonra A seriyasında 63 xalla 4-cü yeri tutur və 3-cü yerdə olan “Yuventus”dan yalnız 2 xal geri qalır.