"Yanvarın 3-nə kimi məndən möhlət istəyib" - "Araz-Naxçıvan"ın yeni baş məşqçisi kimdi?
Futzal üzrə yüksək liqada 2024/25 mövsümünün əvvəli diqqətiçəkən nəticələrlə müşayiət olundu.
Mövsümə uğurlu başlayan "Baku Fire" ilk 8 turda 7 qələbə, 1 heç-heçə əldə edərək tarixdə ilk dəfə qış fasiləsinə lider kimi yollandı. Təbii ki, bunun başlıca səbəbi uzun illərdi çempionatda ağalıq edən "Araz-Naxçıvan"ın Predraq Rayiçin rəhbərliyi altında meydana çıxdığı oyunlarda əsas rəqiblərinin, daha doğrusu, "Neftçi" və "Baku Fire"ın öhdəsindən gələ bilməməsidi.
Qısası, "qırmızı-ağlar"ın 8 matçdan 2-də uduzması, 1-də "sülh"ə razılaşması komandanın 3-cü pillədə qərarlaşmasıyla, durumdan razı qalmayan rəhbərliyin isə Rayiçlə yolları ayırmasıyla nəticələndi. İndi kollektiv yeni çalışdırıcıyla anlaşmalı və çempionluq uğrunda gərgin mübarizədə bəxtini sınamalıdı.
Bəs bu yöndə ilkin addımlar atılıbmı?
"Football-plus.az"ın sualını "Araz-Naxçıvan"ın vitse-prezidenti Mahmud Sadıqov cavabladı:
"Bəli, baş məşqçimizlə yolları ayırmışıq. Yeni çalışdırıcımız böyük ehtimalla əcnəbi olacaq. MDB ölkəsində işləyən mütəxəssislərdən biriylə danışıq aparırıq. Yanvarın 3-nə kimi məndən möhlət istəyib. Başqa klublardan da təklifi var. O, son sözünü dedikdən sonra lazımi addımları atacağıq".
Qeyd edək ki, "Araz-Naxçıvan" 16 xalla 3-cü pillədədi, lider "Baku Fire"dan 6 xal geridədi.
KƏNAN BAHADIR
Digər xəbərlər
