“Araz-Naxçıvan”ın baş məşqçisinə sonuncu şans verildi – “məğlub olsa, yollarımızı ayıracağıq”
Futzal üzrə yüksək liqada 4-cü tur “Araz-Naxçıvan” üçün uğurlu keçmədi.
Muxtar Respublika təmsilçisi əsas rəqiblərindən olan “Neftçi” İK-ya uduzdu – 2:3.
Xatırladaq ki, “qırmızı-ağlar” ilk turda digər əzəli rəqibi “Baku Fire”a da məğlub olub – 6:8. İndi komandanın 6 xalı var və liderlərdən 6 xal geridədi. Təbii, nəticələr son çempiona, büdcəsinə və indiyə qədər qazandığı uğurlarla tanınan “Araz-Naxçıvan”a yaraşmır.
Bəs belə durum mövsümün əvvəlində baş məşqçi postuna təyin edilən Preqraq Rayicin klubdakı gələcəyini təhlükə altına salırmı? Vəziyyətlə bağlı hansısa tədbirlər görülməsi nəzərdə tutulurmu?
“Football-plus.az” bu suallarla “Araz-Naxçıvan”ın vitse-prezidenti Mahmud Sadıqova müraciət etdi:
“Bu gün məşq zamanı baş məşqçi və komandayla görüş keçirdik. Həm çalışdırıcıya, həm də futzalçılara xəbərdarlıq etdik, iradlarımızı bildirdik. Kollektiv dekabrın 7-də, 6-cı tur çərçivəsində “Baku Fire” ilə qarşılaşacaq. Predraq Rayicin taleyi həmin matçdan asılıdı. “Araz-Naxçıvan” məğlub olsa, baş məşqçiylə yollarımızı ayıracağıq. Bu kollektiv mənim ailəmdi. Yanvarda ciddi dəyişikliklər edəcəyik. Yeni oyunçularla danışıqlara başlamışıq. Belə davam edə bilməz. Komandanın durumu bizi çox məyus edir. Ümid edirəm ki, problemlər tezliklə geridə qalacaq, güclənəcəyik”.
KƏNAN BAHADIR
Digər xəbərlər
