Məlum olduğu kimi, Muxtar Respublika təmsilçisi "Yasamal Bakı", "Şuşa" və U-19 yığmamızın öhdəsindən asanlıqla gəlsə də, "Neftçi"yə uduzub. "Baku Fire"a qarşı matçlardan birində bir xal qazanıbsa, birində məğlubiyyətə üzülüb. Nəticələr "qırmızı-ağlar"ın 10 xalla 3-cü sırada qərarlaşmasına səbəb olub.
Xatırlayırsızsa, "Araz-Naxçıvan"ın vitse-prezidenti Mahmud Sadıqov "Football-plus.az"a açqılamasında komanda 6-cı turda "Baku Fire"a uduzacağı təqdirdə baş məşqçi Predraq Rayiclə yolları ayıracaqlarını demişdi.
Sözügedən matç "sülh"lə nəticələndi. Görəsən, bu, mütəxəssisin postundakı ömrünü uzadıbmı? Ümumiyyətlə, rəhbərlik çalışdırıcıyla bağlı yekun qərarını nə vaxt verəcək?
Bu suallarla yenidən Mahmud bəyə müraciət etdik. Onun cavabı:
"Hələ ki bu yöndə konkret qərar verməmişik. Növbəti həftə ərzində komandayla birgə iclas keçiriləcək. Müzakirə ediləsi mövzular var. Hazırda baş məşqçimizlə bağlı məsələ haqda dəqiq nəsə deyə bilmərəm".
KƏNAN BAHADIR
