Kriştiano Ronaldonun Səudiyyə Ərəbistanı nəhəngi ''Əl-Nəsr''də xoşbəxt olmaması və tezliklə klubunu dəyişə biləcəyi ilə bağlı növbəti dəfə şayiələr yayılıb. Bu mövsümün gedişində bir neçə dəfə buna bənzər xəbərlər çıxmışdı. Maddi planda portuqaliyalı superulduzun heç bir problemi yoxdu.

"Football-plus.az" xəbər verir ki, fevralda 40 yaşı tamam olacaq Ronaldo geridə qoymaq üzrə olduğumuz ildə dünya futbolunda hamıdan çox - 285 milyon avro qazanıb. Amma maksimalist kimi tanınan Kriştianonu komandasının nəticələri qane etmir.

Son illərdə Səudiyyə Ərəbistanı futbolunda ''Əl-Nəsr'' yox, ''Əl-Hilal'' ağalıq edir. İddialara görə bu məqam ünlü futbolçunu qane etmir və o, klubunu dəyişmək istəyir. Bir ara hətta Ronaldonun məhz ''Əl-Hilal''a keçə biləcəyi iddia olunmuşdu.

Ronaldo menecerinə yeni variantlarla maraqlanmağı məsləhət görüb. Özü də o, ''Əl-Nəsr'' ilə mövsümün sonunda bitəcək müqaviləsini hələ də yeniləməyib. Ər-Riyad təmsilçisinin rəhbərliyi isə portuqaliyalını əldən vermək istəmir və onu komandada saxlamağa çalışır.

''Əl-Nəsr'' hazırda 13 turu arxada qalan Səudiyyə Ərəbistanı çempionatında 25 xalla 4-cü pillədədi və liderdən 11 xal geridədi. Ronaldo indiyə qədər bu klubda 83 rəsmi oyunda 74 qol, 18 məhsuldar ötürməlik mükəmməl performans sərgiləyib.

ƏLİ