Amerikalı tennisçi Kori Qauff 2024-cü ildə ən çox qazanan qadın idmançıların siyahısında lider olub.

Bu siyahını “Forbes” hazırlayıb. Qauff başa çatmaqda olan ildə 34,4 milyon dollar qazanıb. Bunun 9,4 milyonu turnirlərin, 25 milyonu isə reklam müqavilələrinin payına düşür.

Dünyanın 2-ci qadın tennisçisi İqa Sventek siyahının 2-ci pilləsində qərarlaşıb. Polşalı tennisçi il ərzində 23,8 milyon dollar qazanıb: 8,8 milyonu nəticələri, 15 milyonu isə sponsorluq anlaşmaları sayəsində.

Ötən il məhz Sventek 23,9 milyon qazancla “Forbes”in siyahısına başçılıq edirdi. Bu özünəməxsus reytinqdə 3-cü yeri Çindən olan fristaylçı Eylin Qu tutub. O, bu il 22,1 milyon dollar qazanıb.

Maraqlıdı ki, çinli xanım yarışlarda cəmi 100 min dollar qazanıb, qalan 22 milyon isə reklam və sponsorluq müqavilələrinin payına düşür.

“Top-20”yə dünyanın 1-ci raketkası, belaruslu Arina Sobolenko (5-ci yer, 18,7 milyon) və Qazaxıstan təmsilçisi Yelena Rıbakina (15-ci yer, 7,9 milyon) da düşüb.