Azərbaycanın müxtəlif yaş qrupu üzrə yığmaları ilə bağlı durum heç də ürəkaçan deyil. Məğlubiyyətlər sıralanır, hər kəs bu vəziyyətlə bağlı suallar cavab axtarır.

Məşqçilər Komitəsi də AFFA-ya hesabat təqdim edib. Fernando Santuşun çalışdırdığı əsas komandanın nəticələri də ürəyimizi ağrıdı. “Futbol+” tanınmış futbol funksioneri Tahir Süleymanovun bu mövzuda fikirlərini öyrənib.

- AFFA Məşqçilər Komitəsinin üzvü Yaşar Vahabzadə bildirib ki, yığmaların bu durumda olmasi ilə bağlı hesabat hazırlanıb.
- Bilirsiz ki, istər Məşqçilər, istərsə Klublar Komitələri vaxtilə yaradılan və heç bir qərarverici səlahiyyətə malik olmayan qurumlardı. Hər iki komitədə bu dəfələrlə vurğulanıb, etiraf edilib. Hörmətli Yaşar müəllimin fikirlərinə yox, ümumi vəziyyətə münasibət bildirməyim daha doğru olar. Futbol sistemi işlək mexanizm halında deyil, ümumi inkişafa yox, bir qrup insanınn şəxsi mənafelərinə qulluq edib və təəssüf ki, davam  etməkdədi. Tövsiyələr həmişə verilib və yuxarı futbol instansiyalarında, kabinetlərdə illərdi qalaq-qalaq yığılıb qalıb, toz basıb. Maksimum özlərinə sərf edən bir-iki bəndən istifadə ediblər, 90 faizi kənara qoyulub. Məqsəd ölkə futbolunun dirçəlməsi yox, lippertlərdən, yurçeviçlərdən tutmuş mutulara, andersonlara, santuşlara, ümumilikdə “milliləşdirmələrlə”, havadarlarla, əcnəbilərlə birgə milyonların qazanılmasıdı. Tövsiyələrdən, təkliflərdən əməli addımlara keçmək zamanı çoxdan yetişib. Bu durumun yaranması futbolu zəbt edənlərin məqsədli gedişləri ilə yanaşı, futbolda əməyi keçmiş, təcrübəsi olan, bacarıqlı insanların birliyinin istənilən səviyyədə olmaması ilə bağlıdı. Bu amil futbol camiəsinin tövsiyə, təkliflər çərçivəsindən çıxmasına imkan vermir. Mən də İnkişaf strategiyası ilə bağlı təkliflərimi təqdim etmişəm. Futbolu bilən mütəxəssislərin qərarverici səlahiyyətləri, imkanları olmadan, futbolda ciddi irəliləyişə nail olmaq mümkünsüzdü.

- Aşağı yaş qrupları üzrə çempionatlarda rəqabətədavamlı futbolçu yetişmir. Bunun səbəbini nədə və ya kimdə görürsünüz?
- "Uşaq futbolu yoxdu", "klublar günahkardı" təfəkküründən, ümumi münasibətin, fikirlərin bildirilməsi dairəsindən çıxılmalıdı. Vəziyyətin bu həddə çatmasının bir səbəbi/səbəbkarı var. Müstəqilliyimiz bərpa edildəndən sonra Nazirlər Kabinetinin xüsusi qərarı ilə Azərbaycanda futbolun inkişafı və cavabdehliyi AFFA-ya həvalə edilib. İllərdi dövlətimiz futbola təmənnasız qayğı göstərir. Hazırda hər il federasiya və klublar qarışıq 50 milyondan çox vəsait ayrılır. Sponsorlar, FİFA, UEFA-dan daxil olan vəsaitlər də əlavə edilsə, ölkə şərtləri üçün çox yaxşı maliyyə edir. Peşəkarlıq, məsuliyyət, milli ruh, inkişafı təmin edəcək, görüntü xarakterli yox, ciddi layihələrin həyata keçirilməsi, müvafiq qurumlarla bölgələrdə infrastrukturun müasir tələblər səviyyəsinə gətirilməsi, akademiyalar, maarifləndirmə, düzgün kadr siyasəti, sağlam mühitin yaradılması, ayrılan vəsaitdən səmərəli istifadə - gələcək inkişafın təməl prinsipləridi. Bu işlərə strateji və faktiki cavabdeh qurum AFFA-dı!

- Əsas milli komandamızın problemi nədi? Bu, Fernando Santuş, yoxsa ayrı-ayrı futbolçularla bağlıdı?
- Millinin problemləri Azərbaycan futbolunun ümumi vəziyyətinin əyani mənzərəsidi. İllərdi təhlil edirik, əsaslandırırıq ki, yığma komandanın faciəvi çıxışı təkcə baş məşqçi seçimi ilə bağlı deyil. Torreslərə, foqtslara, santuşlara ödənilən dövlətin, xalqın vəsaiti ilə, AFFA-nın özəyini təşkil və bütün ölkə ərazisini əhatə edən 8 regionda 8 yox, 18 dünya standartlarına cavab verən, mərkəzləşdirilmiş akademiların yaradılması mümkün idi. Bu illər ərzində 300-dən çox futbolçu “milliləşdirilib”, milyonlar havaya sovrulub. Nə vaxta qədər ki, ancaq dar çərçivədə düşünüləcək, futbolda heç bir irəliləyiş olmayacaq. Azərbaycan futbolunun xilası beyinlərin, düşüncələrin dəyişməsindən, işə yanaşmadan, kompleks problemlərin həllindən keçir.

RÖYANƏ OĞUZ