2019-cu ilin dekabrında birinci divizionda çıxış edən “Ağsu”, “Turan Tovuz” və “Zirə-2”nin bir neçə oyununda qeydə alınan şübhəli məqamlarla əlaqədar AFFA-nın nəzdində fəaliyyət göstərən danışılmış oyunlarla bağlı xüsusi komissiyanın və ekspertlərin apardığı araşdırmaya, həmçinin UEFA-dan AFFA-ya daxil olan məlumatlara əsasən, klubların bəzi futbolçularının, futbol funksionerlərinin, o cümlədən futbolda hər hansı fəaliyyəti olmayan şəxslərin nəticəsi manipulyasiya olunan oyunlarda iştirakı müəyyənləşmişdi.

Football-plus.az xəbər verir ki, həmin vaxt 25 futbolçunun futbolla bağlı bütün növ fəaliyyətinə qadağa qoyulmuşdu. Bu xoşagəlməz hadisənin üstündən üç il keçib. Düşünmək olardı ki, artıq ölkə futbolunda belə neqativ olay yaşanmır. Ancaq ötən ilin son aylarında mətbuatda aşağı dəstədə bəzi oyunların nəticələrinin əvvəlcədən razılaşdırılması ilə bağlı xəbərlər yayıldı. “Qara siyahı”da birinci divizionda keçirilən 10-a yaxın qarşılaşma qeyd olunmuşdu. Bu yöndə xüsisilə MOİK-in iştirakı ilə keçirilən görüşlər daha çox şübhə altına düşmüşdü.

Bugünlərdə məsələ ilə bağlı redaksiyamıza ilginc məlumat daxil olub. Söylənilənlərə inansaq, “hərbçilər”in iki futbolçusu ötən ilin dekabrında hüquq-mühafizə orqanları tərəfindən dindirilib. Hər ikisi sorğu-sual zamanı komandalarının oyunlarına pul qoyuluşu etdiklərini etiraf edib. Dindirilmə zamanı futbolçular MOİK – “Səbail-2” matçında “dənizçilər”in qələbəsinə yatırım etdiklərini boyunlarına alıblar.

RƏŞAD