“Real” QK-nın, Ançelotti isə klubun tarixinə düşdü! - ŞƏRH
Dekabrın 18-də FİFA-nın bir il əvvəlki qərarı ilə bərpa etdiyi Qitələrarası Kubokun (QK) finalı keçirildi.
Həlledici matçda rəqibinə heç bir şans verməyən “Real” turnirdəki qələbə sayını rekord həddə çatdırdı.
final
Real - Paçuka 3:0 (1:0)
Real (Madrid, İspaniya, Avropa): Kurtua, Vaskes (Asensio, 88), Rüdiger, Çuameni, Qarsiya, Kamavinqa (Sebalyos, 62), Valverde, Rodriqo (Modriç, 70), Bellingem (Gülər, 88), Vinisius, Mbappe (Dias, 62).
Paçuka (Meksika, Şimali Amerika): Moreno, Barreto, Qonsales, Rodriges (Sançes, 75), Mikolta, Pedrasa, Deossa (Dominges, 88), Bautista (Mena, 75), Montyel, İdrissi (Ernandes, 88), Rondon.
Qollar: Mbappe, 37 (1:0). Rodriqo, 53 (2:0). Vinisius, 84-p. (3:0).
Vərəqələr: Pedrasa, 51. Rondon, 90+3 - sarı.
Hakim: Xesus Valensuela (Venesuela).
18 dekabr. Lusail. 67249 tamaşaçı.
Qeyd edək ki, bu ad altında 1960-2004-cü illərdə təşkil edilən turnirdə Avropa və Cənubi Amerikanın ən güclü klubları iştirak ediblər.
FİFA Klublararsı Dünya Çempionatını təsis etdikdən sonra Qitələrarası Kubok keçirilməyib. Ali futbol təşkilatının qərarı ilə 20 ildən sonra bərpa olunan yarışda dünyanın 6 regionunu təmsil edən klublar iştirak edir. Bu turniri hər il təşkil etməyi lazım bilən FİFA UEFA Çempionlar Liqasının (ÇL) qalibinə birbaşa finalda oynamaq hüququ verib. Başqa sözlə, “Real”ın finalda iştirak edəcəyi əvvəlcədən məlum idi. Digər 5 regionun qalibi isə mükafat uğrunda mübarizəyə 1-ci və ya 2-ci mərhələdən başlamışdı. “Paçuka” finala qədər iki komandaya qalib gəlmişdi: 2-ci mərhələdə Cənubi Amerikanın ən güclü klubu olan “Botafoqo”nu 3:0 hesabıyla məğlub edən meksikalılar pley-offda “Əl-Əhli” ilə qolsuz heç-heçə oynamış və Afrika çempionuna penalti seriyasında üstün gəlmişdilər.
Qətərin Lusail şəhərində keçirilən finalda sensasiya baş vermədi: uruqvaylı Xorxe Almadanın çalşdırdığı “Paçuka” matçın favoriti sayılan “Real”a üç cavbsız qolla uduzdu. Halbuki ilk dəqiqələr meksikalıların üstünlüyü ilə keçmişdi. Kurtuanın bir neçə seyvindən sonra təşəbbüsü tədricən ələ alan ÇL-in son qalibinin 37-ci dəqiqəyə təsadüf edən ilk ciddi hücumu qolla nəticələndi: Mbappe qapıçını aldadan Vinisiusun ötürməsini tamamlamaqda elə bir çətinlik çəkmədi. “Real” fasilədən az sonra daha bir qol vurdu. Rodriqonun uzaq dirək istiqamətində qapıya göndərdiyi top matçdakı intriqaya böyük zərbə oldu. Buna baxmayaraq, rəqib təslim olmaq istəmirdi. Kurtua Qonsales ilə Rondonun təhlükəli zərbələrinin qarşısını almaqla komandasını ilhamlandırdı. Tezliklə qapıçı ilə təkbətəkdən yararlana bilməyən Vinisius Vaskesin qazandığı penaltini qola çevirdi. Bununla da “Real” 22 ildən sonra turnirin qalibi oldu.
Laureatlara gəlincə, Vinisius Junior QK-nın ən yaxşı oyunçusu kimi “Qızıl top” mükafatına layiq görüldü. Onun oyundaşı Federiko Valverdeyə “Gümüş top”, “Paçuka”nın 19 yaşlı yarımmüdafiəçisi Elias Montyelə isə “Bürünc top” təqdim edildi.
Faktlar
* “Real” 4-cü dəfə QK-nın qalibi olmaqla “Milan”ı arxada qoyaraq yeni rekord müəyyən etdi. İspaniya klubu bu turnirdə daha əvvəl 1960, 1998 və 2002-ci illərdə çempion olmuşdu.
* “Real” 2024-cü ildə 5-ci titulunu qazandı. Komanda daha əvvəl İspaniya Superkuboku, İspaniya çempionatı, Çempionlar Liqası və Avropa Superkubokunun qalibi olmuşdu.
* “Real” ilə 15-ci titulunu qazanan Ançelotti Migel Munyosu arxada qoyaraq klub tarixinin ən titullu məşqçisi oldu. İtaliyalı mütəxəssis indiyədək müxtəlif klublarla (Yuventus, Milan, Çelsi, PSJ, Bavariya, Real) 31 titula (İntertoto Kubokunu da nəzərə almaqla) sahib olub.
* “Real” ilə 28-ci titulunu qazanan Modriç Daniel Karvaxalı arxada qoyaraq klub tarixinin ən titullu oyunçusu oldu.
* Vinisius “Real” ilə 14-cü titulunu qazandı.
* Vinisius “Real” ilə iştirak etdiyi 12 finalda 13 qolun vurulmasında iştirak edib. Braziliyalı futbolçu həlledici matçlarda 8 qolun və 5 məhsuldar ötürmənin müəllifi olub. Onun cari mövsümdə madridlilərin formasında bütün turnirlərdə meydana çıxdığı 22 matçda 14 qol vurub 8 məhsuldar ötürmə etdiyini də qeyd edək.
* Mbappe karyerasında 20-ci titulunu qazandı. O, ən titullu fransalı futbolçular arasında 9-cu yeri tutur. Bu siyahıya 33 titulla Kərim Benzema başçılıq edir.
* Mbappe müxtəlif turnirlərdə iştirak etdiyi son 7 finalda 8 qol vurub. Maraqlıdı ki, bu qollardan 4-ü Qətərin Lusail şəhərinin eyniadlı stadionunda qeydə alınıb. Kilian Fransa yığmasının formasında DÇ-2022-nin bu arenada keçirilən Argentina ilə finalında (3:3) het-trik etmişdi.
Oyundan sonra
Karlo Ançelotti, “Real”ın baş məşqçisi:
“Sözün düzünü deyəcəyəm: “Real” ilə titul qazanmaq hər hansı başqa komanda ilə müqayisədə daha asandı. Bu, dünyanın ən yaxşı futbolçularının cəmləşdiyi və azarkeşlərindən inanılmaz dəstək alan fantastik klubdu. “Real” ilə 15 titul qazanmaq çoxdu! Buna çox sevinirəm. Çox xoşbəxtəm. Bu, böyük uğurdu. Belə oyunlar həmişə qeyri-adi olur. Ona görə ki, rəqibi tanımırsan, matç isə həftənin ortasında keçirilir. Oyuna ləng başlasaq da, tədricən nəzarəti ələ aldıq. Rəqiblə müqayisədə ustalıq səviyyəmiz daha yüksək idi, amma finala düzgün münasibət bəsləmək tələb olunurdu. Çox xoşbəxtik. Bu, vacib titullardan biridi. Bizim üçün fantastik il oldu. Amma ilboyu müxtəlif çətinliklərlə, məsələn zədə problemi ilə üzləşdiyimizi də deməliyəm. 2024-ü böyük uğurlarla başa vururuq. Bundan artığına nail olmaq mümkün deyildi. Amma “Real”da həmişə deyildiyi kimi, indi gəlin, 2025 haqda düşünək”.
Kilian Mbappe, “Real”ın hücumçusu:
“Qitələrarası kubok Madridə qayıtdı. Bu mövsüm ikinci titulumu qazandım. Bu dəfə “Lusail” stadionunda qalib gəldim...”
Digər xəbərlər
