Ən son ''Qarabağ''ın oyununu idarə edən portuqaliyalı Antonio Nobre ilə bağlı Türkiyə mətbuatında ortaya maraqlı iddia atılıb.

Həmin iddiaya görə UEFA bu hakimə artıq Çempionlar Liqasında əsas və pley-off mərhələlərində oyun verməyəcək. 36 yaşlı ədalət təmsilçisi ötən mövsüm ÇL-in qrupunda ''Bavariya''nın doğma meydanda ''Qalatasaray''ı 2:1 hesabı ilə məğlub etdiyi qarşılaşmanı idarə etmişdi. Nobrenin həmin oyundakı idarəçiliyi ''Cim-Bom'' cəbhəsinin böyük narazılığına səbəb olmuşdu. Həm Keynin vurduğu qolda protokola uyğun davranmayan, həm Devisi meydandan qovmağa cürət etməyən Nobredən ''Qalatasaray'' daha sonra UEFA-nın Nizam-İntizam Komitəsinə 5 səhifəlik şikayət göndərmişdi.

Maraqlıdı ki, o vaxtdan bu yana bu hakimə hələ də ÇL-də oyun verilməyib. Düzdü, o, avrokubok qarşılaşmalarına təyinat almaqda davam edir. Nobre ən son ''Qarabağ''ın səfərdə ''Elfsborq''a minimal hesabla uduzduğu oyunda fit sahibi olmuşdu. Amma deyilənə görə onun səviyyəsi aşağı endirilib və artıq ÇL-də əsas və pley-off mərhələsində bu hakimə oyun verilməyəcək.

ƏLİ