Bu gün Konfrans Liqasının 1/4 finalı çərçivəsində Pireydə çox mühüm və prinsipial bir oyun keçiriləcək.
"Football-plus.az" xəbər verir ki, Yunanıstan nəhəngi ''Olimpiakos'' doğma ''Georgios Karaiskakis''də Türkiyə nəhəngi ''Fənərbaxça''nı qəbul edəcək. Xatırladaq ki, ''Fənər'' bu oyuna rahat hazırlaşa bilmək üçün aprelin 7-də ''Qalatasaray''a qarşı baş tutmalı olan superkuboku belə desək, qurban vermişdi. Həmin oyuna ''Fənər''in U-19 komandası çıxmışdı. ''Sarı-lacivərdlilər''də Mərt Müldür, Sərdar Əziz və Sərdar Dursun adları avrokubokların iştirak ərizəsinə salınmadığına görə, Ciku, Kinq və Mərt Hakan Yandaş isə zədə üzündən meydana çıxa bilməyəcək. Hakimə gəlincə, böyük maraqla gözlənilən bu qarşılaşmanı isveçrəli Sandro Şerer idarə edəcək. VAR hakimi funksiyasını isə almaniyalı Bastian Dankert icra edəcək. Maraqlıdı ki, Şerer indiyə qədər ''Olimpiakos''un 3 oyununu idarə edib və komanda hər 3 görüşdə qələbəyə həsrət qalıb! Konkret desək, ''Olimpiakos'' bu hakimin idarəçiliyi altında 2021/22-də AL-in 1/16 finalında səfərdə ''Atalanta''ya 1:2 hesabı ilə uduzubsa, 2022/23-də AL-in təsnifatının pley-offunda evdə ''Apollon'' ilə 1:1 bərabərə qalıb. Bundan başqa Şerer 2018-in sentyabrında Yunanıstan çempionatında da ''Olimpiakos''un oyununu idarə edib və komanda həmin matçda evdə PAOK-a minimal hesabla uduzub. ''Fənərbaxça''nın oyununa isə Şerer indiyə qədər təyinat almayıb. Türkiyə təmsilçilərindən ''Qalatasaray'' bu hakimin idarəçiliyində evdə iki dəfə - 2021-in noyabrında ''Lokomotiv''lə və 2021-in avqustunda ''Sent Conston'' ilə 1:1 bərabərə qalıbsa, ''İstanbul BŞ'' 2019-un noyabrında səfərdə ''Volfsberq''i 3:0 məğlub edib.
ƏLİ