Fələstin tərəfdarları Meyvezerə hücum etdilər
47 yaşlı amerikalı boksçu, dəfələrlə dünya çempionu olmuş Floyd Meyvezer Londonda hücuma məruz qalıb. Bu haqda xəbəri “The Sun” yayıb. Həmin nəşr bildirir ki, bədniyyətlilər Fələstin tərəfdarı olub, hücum isə boksçunun Qəzzada yaranan vəziyyətə dari mövqeyi ilə bağlıdı. Alış-veriş etmək üçün Londondakı zərgərlik dükanlarından birinə daxil olan Meyvezer məhz orda hücuma məruz qalıb. Parlaq yaşıl rəngli gödəkçə geyən Floyd dərhal ətrafdakıların diqqətini çəkib. Şahidlərin dediyinə görə, 8-9 adam ona hücum edərək təhqir etməyə və İsrailə dəstək verməsinin səbəbini soruşmağa çalışıb.
Meyvezer özünü itirməyərək mövqeyi ilə qürur duyduğunu deyib. Bundan sonra münaqişə başlayıb. Fələstin tərəfdarları, eləcə də boksçunun mühafizəçiləri küçəyə çıxaraq münasibətləri aydınlaşdırmağa çalışıb. Floyd özü zərər çəkməyib – mühafizəçilər onu vaxtında maşına otuzdura bilib, idmançı yüngülvari zərbə alıb.
“The Sun” şahidlərdən birinin sözlərinə yer verib:
“Meyvezer onu müşayiət edən şəxslərlə birgə vitrinlərə baxırdı. Orda əsasən asiyalılar var idi. Onlardan biri qışqırdı ki, baxın, o, genosidi dəstəkləyir! Dərhal dükanda olan başqa müştərilər müdaxilə etdi. Kütləvi dava-dalaş oldu. Adamlar Floydu tutmaq və vurmaq üçün itələşirdilər. Mühafizəçilər Meyvezeri çıxışa doğru yönəltdilər və zərbə gördülər. Ardından Floydu “Rolls-Royce” maşınına əyləşdirdilər. Maşın küçəni tərk edəndə içki qabları onun üzərinə uçdu. Genosiddə ittiham olunan boksçu çox danışmadı, sadəcə, ətrafındakılara dedi ki, “burdan çıxıb gedək”. Orda 20-30 adam var idi, təxminən 10-15-i hücum edirdi”.
Yeri gəlmişkən, Floyd özü hansısa ziyan görməsini təkzib edib:
“Vəziyyəti aydınlaşdırmaq istəyirəm. Şayiələr reallığı əks etdirmir. Məni nə vurublar, nə də mənə toxunublar. Mühafizəçilər vəziyyəti nəzarət altında saxlayırdı. Böyük Britaniyaya 48 saatlığa, şopinq etmək üçün gəlmişdim, təəssüf ki, neqativ adamlar saxta tarixçələr uydurdular”.
Fələstin tərəfdarlarının belə reaksiyası gözlənilən idi, axı Floyd dünya idmanında İsrailin ən qatı tərəfdarlarından biridi. Bu hücumdan bir neçə gün əvvəl “Mayweather Israel Initiative” adlı xeyriyyə fondu yaradıb, məqsəd hər israilli yetimə doğum günündə hədiyyə verməkdi. Amerikalının dəstəyi bununla da bitmir. O, oktyabrda yollandığı İsraili “evimdən uzaqdakı evim” adlandırmışdı. Bundan başqa, Floyd hərbi bazaya baş çəkib, yaralı israilli əsgərləri ziyarət edib, hətta bu ölkənin baş naziri Benyamin Netanyahu ilə də görüşüb. Boksçu 75 yaşlı baş nazirlə görüşdə belə deyib:
“Bu gün sizlə görüşmək mənim üçün şərəf oldu. Sizin gücünüzün və mətanətinizin tayı-bərabəri yoxdu, yəhudi xalqının və İsrail vətəndaşlarının müdafiəsinə sadiqliyiniz isə adamı ruhlandırır”.
Karyerasını 2017-də bitirən amerikalı o vaxtdan bəri bəzən sərgi döyüşlərinə qatılır, ancaq daha çox bizneslə məşğuldu. Meyvezer planetin ən zəngin idmançılarından biri kimi tanınır. Onun elit səviyyəli daşınmaz əmlakları, idman komandaları, fitnes zalları və başqa aktivləri var.
Digər xəbərlər
