Ruben Amorimin ''Sportinq''dən ayrılaraq ''Mançester Yunayted''in başına keçməsi hələ ki, heç bir tərəfə fayda gətirməyib.

''Yunayted'' portuqaliyalıya qədər necə qeyri-sabit çıxış edirdisə, elə də çıxış etməkdə davam edir. ''Sportinq'' isə tanınmaz hala düşüb. Lissabon nəhəngi Amorim ayrılarkən 11 oyuna 11 qələbə qazanmışdı və turnir cədvəlində ən yaxın rəqibini 5 xal qabaqlamaqla inamla liderlik edirdi. Bundan başqa komanda bütün turnirləri nəzərə almaqla 17 oyunluq məğlubiyyətsiz seriyaya malik idi.

Amorimin yerinə ötən mövsümdən onun köməkçisi işləyən Joao Pereyra baş məşqçi vəzifəsinə gətirildi. Düzdü, Pereyranın müstəqil məşqçi kimi təcrübəsi yox idi. Amma komandanın qısa müddət ərzində bu dərəcədə geriləyəcəyini az adam proqnozlaşdırardı.

Komanda bu məşqçi ilə keçirdiyi 8 rəsmi oyundan 3 qələbə, 1 heç-heçə, 4 məğlubiyyətlə ayrılıb. ''Sportinq'' artıq çempionatda liderliyi də əldən verib. Ona görə də Pereyranın tezliklə istefaya göndəriləcəyi ilə bağlı xəbərlərin yayılması normaldı.

Portuqaliya mətbuatında rəhbərliyin hazırda məşqçi axtarışında olduğu qeyd olunub. Qısa müddət ərzində yeni təyinatın açıqlanacağı gözlənilir.

ƏLİ