AFFA İcraiyyə Komitəsinin (İK) iclasında ad-soyadı açıqlanmayan bir şəxs də iştirak edib.

Qurum iclasla bağlı yaydığı xəbərdə bu məqamı gizlətsə də, İK üzvü “report”a müsahibədə ağzından söz qaçırıb. Deyib ki, 1-ci liqa təmsilçisi “Mingəçevir”ə dəstək olmaq istəyən şirkətin rəhbəri də iclasda olub. O da bəllidi ki, söhbət ötən həftə Messini ölkəmizə gətirən Adnan Əhmədzadənin sahibi olduğu ASTA (Azerbaijan Sport Talents Academy) şirkətindən gedir. Həmin şəxs “Mingəçevir”lə bağlı layihə təklif edib. Layihədə şəhərdə infrastrukturun qurulması, 2-3 il ərzinə elitaya yüksələcək güclü komanda qurulması ilə bağlı təkliflər var.

Belə çıxır ki, Adnan bəy bir neçə gün əvvəl “Mingəçevir”lə bağlı xəbərləri yaxın buraxmamaqla yumşaq desək, qeyri-səmimilik edib. Yeri gəlmişkən, bir neçə gün əvvəl Futbolun İnkişaf Fondunun (FİF) rəhbəri Tural Piriyev də daha bir kluba sponsor tapıldığını bildirmişdi. Belə çıxır ki, o anonsda da söhbət “Mingəçevir”dən gedirmiş. Bizə çatan bilgiyə görə, “nur şəhəri”nin komandasının problemlərinin həllində FİF-in də rolu olub. Sadəcə, bu məqamın qabardılmasını istəmirlər. Hər halda, bilinən odu ki, yanvardan “Mingəçevir”in ağ, daha dəqiqi, ASTA-lı günləri başlayır.

RÖYANƏ OĞUZ