final
Rasinq - Kruzeyro 3:1 (2:0)
Rasinq (Avelyaneda, Argentina): Aryas, Qarsiya Basso, Roxas, Di Çezare, Kintero (Solari, 87), Martirena, Almendra (Sukulini, 56), Sosa, Nardoni, Salas, A.Martines (R.Martines, 75).
Kruzeyro (Belu Orizonte, Braziliya): Kassio, Morlon (Kenji, 85), Vilyalba, Villiam, Joao Marselo, L.Romero (Barreal, 78), Mateus Pereyra, Uolas (Lukas Silva, 30), Mateus Enrike, Kayo Jorje, Qabriel Veron (L.Dias, 78).
Qollar: Martirena, 15 (1:0). A.Martines, 20 (2:0). Kayo Jorje, 52 (2:1). R.Martines, 90+5 (3:1).
Vərəqələr: L.Romero, 43. Lukas Silva, 45+3. Qarsiya Basso, 59. Nardoni, 81. Mateus Pereyra, 82. Di Çezare, 83. R.Martines, 90+6 - sarı.
Hakim: Esteban Ostoyiç (Uruqvay).
23 noyabr. Asunsyon. 43828 tamaşaçı.

Noyabrın 23-də Cənubi Amerikanın nüfuzuna görə ikinci klub turnirində 2024-cü il mövsümünə yekun vuruldu.

Sudamerikana Kubokunun (SK) finalında Argentinanın “Rasinq” və Braziliyanın “Kruzeyro” komandaları qarşılaşdılar. Hər iki klub finala ilk dəfə çıxmışdılar. Həlledici oyun Paraqvayda - Asunsyon şəhərindəki “General Pablo Roxas” stadionunda təşkil edildi.

Xatırladaq ki, yarımfinalda da eyni ölkələrin təmsilçiləri qarşılaşmış, “Kruzeyro” iki oyunun nəticəsinə (1:1, 1:0) əsasən “Lanus”u, “Rasinq” isə “Korintians”ı (2:2, 2:1) mübarizədən kənarlaşdırmışdı. Final matçı braziliyalıların üstünlüyü ilə keçdi. Fernando Dinizin çalışdırdığı “Kruzeyro” rəqibini topa daha çox – 70 faiz sahibolmada üstələdi. Hər iki komanda qapıya eyni sayda – 5 dəqiq zərbə endirdi. Ancaq matçın ilk yarısında argentinalıların üstünlüyü aşkar idi və 61 yaşlı Qustavo Kostasın komandası bundan məharətlə istifadə etdi. Martirena 3-cü dəqiqədə qapıya yol tapsa da, ofsayd səbəbi ilə qol hesaba alınmadı. Uruqvaylı yarımmüdafiəçi 12 dəqiqi sonra qaydalar çərçivəsində qol vuraraq hesabı açdı.

Dayanmaq bilməyən avelyanedalılar az sonra hücumçu Adrian Martines ilə ikinci topu qapıdan keçirdilər. “Rasinq” bundan sonra müdafiəyə və əks-hücum taktikasına daha çox üstünlük verdilər. Braziliyalılar topa daha çox nəzarət etsələr də, fasiləyə qədər hesabı dəyişə bilmədilər. Amma ikinci hissənin əvvəlində Kayo Jorje komandasına ümid verdi. Fərqin minimuma enməsindən ruhlanan “Kruzeyro” tədricən daha böyük qüvvə ilə hücuma atılırdı. Dinizin komandası son dəqiqələrdə artıq müdafiəni böyük ölçüdə unudaraq yalnız bərabərlik qolu haqda düşünürdü ki, həlledici məqamda rəqib 3-cü qolu vurdu: kolumbiyalı Roxer Martinesin dəqiq zərbəsi matçda son nöqtəni qoydu.

Beləliklə, finalçı kimi birinci cəhdi uğurlu alınan “Rasinq” ilk dəfə SK-nın qalibi oldu. Braziliya klubları isə “Kruzeyro”nun simasında bu turnirdə ardıcıl 3-cü finalda məğlub oldular: əvvəlki iki finalda “Fortaleza” və “San Paulu” da azarkeşlərini məyus etmişdilər. Maraq üçün onu da qeyd edək ki, əsası 2002-ci ildə qoyulan SK-da ən çox qalib gələn komandalar “Boka Xuniors”, “İndependyente” (hər ikisi Argentina), “LDU Kito”, “İndependyente del Valye” (hər ikisi Ekvador) və “Atletiko Paranaense” (Braziliya) azarkeşlərini iki dəfə sevindiriblər. Bu dəfəki qalib “Rasinq”in gələn mövsüm Argentinanı Libertadores Kubokunda təmsil edəcəyini də əlavə edək.