Noyabrın 19-da Cənubi Amerikada DÇ-2026-nın seçmə turnirinin 12-ci turunun oyunlar keçirildi. Lider Argentina qələbə qazandı, əsas izləyiciləri Uruqvay, Kolumbiya və Braziliya isə xal itirdi.

Sonuncu dünya çempionu əvvəlki oyunda səfərdə Paraqvaya 1:2 hesabıyla uduzmuşdu. Buna baxmayaraq, 1-ci yerdəki mövqeyini itirməyən Argentina yığmasının evdə Perudan maksimum xal almaqda çətinlik çəkməyəcəyi güman olunurdu. Nəticə gözlənilən kimi oldu, amma “albiselesta” autsayderlərdən biri üzərində qələbəni çətinliklə qazandı. Lautaro Martines 55-ci dəqiqədə Messinin ötürməsi ilə hesabı açdı. “İnter”in 27 yaşlı hücumçusu milli formadakı qollarının sayını 32-yə çatdırmaqla əfsanəvi Dieqo Maradonanın göstəricisini təkrarladı.

Qeyd edək ki, Argentina yığmasında ən çox qol vuran futbolçu Messidi. O, 112 dəfə rəqib qapılarına yol tapıb. Qabriel Batistutanın 55, Serxio Aqueronun 41, Ernan Kresponun hesabında isə 35 qol var. Martineslə Maradona hərəyə 32 qolla yığma tarixinin ən yaxşı bombardirlərinin siyahısında 5-6-cı yerləri bölüşür. Messinin milli formada 58-ci məhsuldar ötürməni etməklə dünya futbolunda Lendon Donovana (ABŞ) məxsus rekordu təkrarladığıını xüsusi vurğulayaq.

Argentina hazırda əsas izləyicisini 5 xal qabaqlayır. Uruqvay yığması bir neçə gün əvvəl evdə Kolumbiyanı 3:2 hesabıyla məğlub etməklə mundialın seçmə turnirində 4 oyunluq qolsuz və qələbəsiz seriyaya son qoymuşdu. Marselo Byelsanın komandası Braziliyaya qarşı səfər matçında heç də zəif təsir bağışlamadı. Fasilədən sonra Valverde qonaqları hesabda önə keçirdi, çox keçmədən “Flamenqo”nun yarımmüdafiəçisi Jerson cavab qolunu vurdu. Salvadorda keçirilən oyunun nəticəsi meydandakı mübarizənin axarına uyğun oldu – 1:1.

Bu nəticə Uruqvayı 2-ci yerdə saxladı, Dorival Juniorun çalışdırdığı Braziliya isə adıcıl ikinci heç-heçə ilə 4-cü yerdən 5-ə düşdü. Diqqəti cəlb edən fakt kimi Vinisius Juniorun milli formada keçirdiyi son 5 oyunda məhsuldar fəaliyyəti ilə seçilmədiyini də bildirək.

Uruqvay artıq böhrandan çıxarkən, Kolumbiya belə vəziyyət yaşamaqdadı. Əslində Ekvadorla ev oyununun ilk yarısı meydan sahiblərinin böyük bəxtsizliyi ilə yadda qaldı: onlar bir neçə real qol şansından yararlana bilmədilər. Rəqib müdafiəçi İnkapye 34-cü dəqqiədə Kordobaya qarşı kobudluğa görə meydandan qovularkən kolumbiyalıların say üstünlüyündən istifadə edəcəklərini düşünmək olardı. Lakin Valensiyanın erkən qolu ilə qalib gələn Ekvador yığması əzmkarlıq göstərməklə 3-cü yerə çıxdı. Sebastyan Bessasesenin komandasının seçmə turnirdə ardıcıl 5-ci matçda top buraxmadığını da vurğulayaq.

Çətin Boliviya səfərində bir xal qazanan Paraqvay yığması bu regiondan mundialın final mərhələsinə birbaşa vəsiqə verən ilk 6 yerdən birini tutmaq şansını bir qədər də artırdı.

Cənubi Amerika
12-ci tur
Argentina - Peru 1:0 (0:0)
Argentina: E.Martines, Otamendi, Talyafiko, Montyel (N.Peres, 76), Balerdi (Medina, 90), De Paul (Lo Çelso, 81), Makallister (Paredes, 90), E.Fernandes, Messi, X.Alvares (Simeone, 81), Lautaro Martines.
Peru: Qalyese, Sambrano, Kalyens, Advinkula, Migel Arauxo, Sonne (Reyna, 73), Penya (Kispe, 86), Kastilyo, P.Gerrero (Lapadula, 64), Polo, Valera (Flores, 73).
Qol: Lautaro Martines, 55.
Vərəqələr: Migel Arauxo, 44. Sambrano, 88. Lapadula, 90+3 - sarı.
Hakim: Vilmar Roldan (Kolumbiya).
19 noyabr. Buenos Ayres.

Braziliya - Uruqvay 1:1 (0:0)
Braziliya: Ederson, Markinyos, Qabriel Maqalyans, Danilo, Abner (Martinelli, 58), Jerson (Lukas Paketa, 86), Bruno Gimaraynş (Andre, 86), Rafinya, Vinisius Junior, İqor Jezus (Luis Enrike, 58), Savinyo (Estevao, 73).
Uruqvay: Roçet, X.Ximenes, Saraççi, Varela, M.Olivera, Bentankur, Valverde, Uqarte, Maksimiliano Arauxo (K.Olivera, 81), Pelyistri (Xose Rodriges, 66), D.Nunyes (R.Agirre, 46).
Qollar: Valverde, 55 (0:1). Jerson, 62 (1:1).
Vərəqələr: Uqarte, 41. Rafinya, 69. Varela, 83. Lukas Paketa, 89. Qabriel Maqalyans, 90+3 - sarı.
Hakim: Pyero Masa (Çili).
19 noyabr. Salvador.

Kolumbiya - Ekvador 0:1 (0:1)
Kolumbiya: K.Varqas, Moxika (K.Qomes, 90+3), D.Sançes, Lukumi, Munyos, Xames Rodriges, Portilya, Rios (Kintero, 59), L.Dias, C.Aryas (Duran, 59), Kordoba (Borre, 86).
Ekvador: Qalindes, Estupinyan (Merkado, 90+2), Paço, İnkapye, Ordonyes, Franko, Plata (K.Rodriges, 79), M.Kaysedo, Vite (F.Torres, 46), Minda (Çaves, 60), Valensiya (Qrueso, 46).
Qol: Valensiya, 7.
Vərəqələr: Qrueso, 54. Portilya, 60. Duran, 73. M.Kaysedo, 85. Lukumi, 90+5 - sarı. İnkapye, 34 – qırmızı.
Hakim: Esteban Ostoyiç (Uruqvay).
19 noyabr. Barrankilya.

Boliviya - Paraqvay 2:2 (1:0)
Boliviya: Viskarra, Akin, R.Fernandes (Vilyamil, 70), Suares, Medina, Kuelyar, R.Vaka, Mateus (L.Çaves, 70), E.Vaka (Morales, 46), Terseros, Alqaranyas (Monteyro, 70).
Paraqvay: X.Fernandes, Q.Qomes, Balbuena, Alonso, Kaseres, Sandes (Ensiso, 46), Almiron (R.Sosa, 86), Vilyasanti (Ovyedo, 87), Qalarsa, D.Qomes (Alexandro Romero, 65), Arse (Sanabriya, 65).
Qollar: E.Vaka, 15 (1:0). Almiron, 71 (1:1). Terseros, 80-p. (2:1). Ensiso, 90+1 (2:2).
Vərəqələr: Terrasas, 82 (meydandan kənarda). D.Qomes, 83 (meydandan kənarda) - qırmızı.
Hakim: Andres Matonte (Uruqvay).
19 noyabr. El Alto.

Çili - Venesuela 4:2 (3:2)
Çili: Kortes, Maripan, Eçeverriya, P.Dias, Suaso, Vidal (Kabral, 67), D.Valdes, Pisarro (Paves, 81), E.Varqas (Mora, 81), Aravena, Sepeda (M.Gerrero, 81).
Venesuela: Romo, Anxel, R.Ramires, Navarro (Kadis, 87), Aramburu (Ferraresi, 71), Rinkon (C.Murilyo, 55), Soteldo, Xose Martines, Seqoviya, Rondon (E.Ramires, 71), Savarino (Andrade, 71).
Qollar: Savarino, 13 (0:1). E.Varqas, 20 (1:1). R.Ramires, 22 (1:2). Rinkon, 29-öz qapısına (2:2). Sepeda, 38 (3:2). Sepeda, 47 (4:2).
Vərəqələr: Vidal, 37. Aramburu, 43. Anxel, 78. Xose Martines, 85 - sarı.
Hakim: Fakundo Telyo (Argentina).
19 noyabr. Santyaqo.

1. Argentina 12 8 1 3 21-7 25
2. Uruqvay 12 5 5 2 17-9 20
3. Ekvador (-3) 12 6 4 2 11-4 19
4. Kolumbiya 12 5 4 3 15-10 19
5. Braziliya 12 5 3 4 17-11 18
6. Paraqvay 12 4 5 3 8-7 17
7. Boliviya 12 4 1 7 13-27 13
8. Venesuela 12 2 6 4 11-15 12
9. Çili 12 2 3 7 9-20 9
10. Peru 12 1 4 7 3-15 7

Bombardirlər: Messi (Argentina) - 6, D.Nunyes (Uruqvay) - 5, Rafinya (Braziliya), L.Dias (Kolumbiya), Sanabriya (Paraqvay), Terseros (Boliviya) - 4.
Növbəti turun oyunları gələn il martın 20-də keçiriləcək: Uruqvay – Argentina, Ekvador – Venesuela, Braziliya – Kolumbiya, Paraqvay – Çili, Peru – Boliviya.