Transfer dönəminə sürətli başlayan, amma sonradan səssizliyə bürünən ''Trabzonspor'' müdafiə xəttini çox önəmli bir futbolçu ilə gücləndirib.

Trabzon təmsilçisi ''Atletiko''dakı çıxışı ilə futbol dünyasında kifayət qədər populyar olan Stefan Saviçlə anlaşıb. Səudiyyə Ərəbistanından daha sərfəli təklif almasına rəğmən Abdulla Avcı ilə söhbət etdikdən sonra ''Trabzonspor''u seçən monteneqrolu futbolçu dünən axşam Trabzona gəlib. Fanatlar onu böyük coşqu ilə qarşılayıblar. Təcrübəli mərkəz müdafiəçisinin üçillik müqaviləyə imza atacağı gözlənilir. Daha öncə ''Partizan'', ''Mançester Siti'', ''Fiorentina'' kimi klublarda top qovmuş 33 yaşlı futbolçu son 9 mövsümü ''Atletiko''da keçirib.

Madrid nəhəngi 2015-də onu 12 milyon avroya transfer etmişdi. Vətənində 6 dəfə ilin ən yaxşı futbolçusu seçilən Saviç ''Atletiko''da 9 il ərzində 217 rəsmi oyuna çıxaraq 2 qol, 3 məhsuldar ötürmə ilə fərqlənib və 4 titul qazanıb. Monteneqro yığmasında isə 74 oyun keçirib və 9 qol vurub.

ƏLİ