“Mövsüm başlamamış PFL bayrağı altında keçirilən yarışlarda iştirak edəcək bütün komandaların stadionlarının təftişi həyata keçirilir. Məlumdu ki, premyer-liqa və 1-ci liqanın bəzi komandalarının çıxış etdiyi stadionlar istisna olmaqla, başqalarında ot örtüyünə peşəkar səviyyədə baxış-qulluq həyata keçirilmir. Buna da səbəb baxımın əlavə maliyyə tələb etməsidi. Biz də arzulayardıq ki, oyunlar yüksək səviyyədə qulluq göstərilən stadionlarda keçirilsin. 1-2-ci liqadalarda indiki məqamda ot örtüyü ilə bağlı problemlərin olması ilə razıyıq. Çünki əksər stadionlarda ot örtüyü təbii yolla, çayır və digər az da olsa yaşıllıq yarada biləcək bitkilərin əkilməsi ilə qurulur. Bu zaman da xüsusən hava soyuduqca örtük ağırlaşır və bir çox hallarda yüklənməyə tab gətirməyərək sıradan çıxır. "Karvan"ın da timsalında bunun şahidi olduq. Bu, bizim üçün də xoş deyil. Sadəcə, alternativ olmadığına görə belə stadionlarda oyun keçirmək məcburiyyətindəyik. Burdan digər bir sual da ortaya çıxır. Axı bizim məqsədimiz həm də azarkeşləri uzağa aparmamaqdı. Belədə yevlaxlılar üçün daha yaxşı vəziyyətdə olan hansı məkanı seçə bilərik ki? Digər tərəfdən, stadion, yararlı infrastruktur dedikdə təkcə ot örtüyü nəzərdə tutulmur. Azarkeşlərin rahat gediş-gəlişi, əyləşməsi də var. Nəinki 1-ci liqada, ümumiyyətlə, ölkədə, demək olar ki, "Qəbələ" kimi infrastrukturu olan klub yoxdu. Hazırda hər kəsi onlarla müqayisə etmək də doğru olmaz. Çünki xərclər böyüyür, xüsusilə də aşağı liqalarda büdcələr kiçikdi. Amma bu o demək deyil ki, belə də qalacaq. Bu məsələyə də müdaxilə ediləcək və gələcəkdə heç olmasa, 1-ci liqa klublarının stadionlarının "Qəbələ"nin ehtiyat arenası səviyyəsində olmasının tələb edilməsi planlaşdırılır. Amma bunlar zaman və böyük maliyyə tələb edir. İndiki məqamda ideal stadion tələbini 1-ci liqa klublarının qarşısına qoya bilərik, amma nəticə əldə edəcəyimiz inandırıcı görünmür".