Sitat: “Məşqçilik karyeramda hansı uğurları əldə etdiyim futbol ictimaiyyəti üçün sirr deyil” – Cavid Hüseynov

Misli premyer-liqasının 15-ci turu “Səbail” üçün uğurlu keçmədi. “Sabah”a uduzan komanda “Kəpəz”in “Şamaxı”nı məğlub etməsi nəticəsində sonuncu pilləyə düşdü. Beləliklə, Bayıl təmsilçisi Cavid Hüseynovun rəhbərliyi altında meydana çıxdığı üçüncü matçda da qələbəyə həsrət qaldı.

Oyunsonrası mətbuat konfransında iştirak edən mütəxəssis isə yenə şikayətlənməkdən çəkinmədi. Gah heyətin kasadlığını ön plana çəkdi, gah da təyinatından əvvəl olan problemləri. Sözlərini tamamlayarkən isə əvvəlki çatışmazlıqlardan danışmağın etik olmadığı dedi. Maraqlıdı, bu danışmaq deyilsə, bəs nədi?

“Dənizçilər”in cari mövsümlə bağlı yeganə hədəfi premyer-liqada qalmaqdı. Bu öz yerində. Başqa məqsədin olması üçün isə möcüzə lazımdı. Düzdü, komanda ölkə kubokunda 1/4 finala yüksəldi. Lakin bu mərhələdə “Qəbələ” – “Qarabağ” cütünün qalibiylə qarşılaşacağını nəzərə alsaq, yarımfinal şansının minimum olduğunu deyə bilərik. Əsas rəqiblərdən olan “Kəpəz” isə canlanmaqdadı. Gəncə təmsilçisi oyundan-oyuna daha inamlı, istəkli, əzmkar və döyüşkən çıxışla yadda qalır. “Səbail”də isə əksini görürük. Turlar ötdükcə yaradılan təhlükəli vəziyyyətlərin sayı azalır, komanda baxımlı oyun göstərə bilmir, ardıcıl xal itkiləri psixoloji sarsıntının dərəcəsini artırırsa, fiziki hazırlıq səviyyəsi ürəkaçan deyil. Elə sonuncu məqamı Hüseynov özü də etiraf edib.

Görünür, “Səbail”in rəhbərliyi qış fasiləsində baş məşqçiylə bağlı məsələyə qayıtmalı olacaq. Onsuz da büdcəsi azaldılan klubun maliyyə imkanı xeyli zəifləyib. Çalışdırıcının istək və tələblərinin tam qarşılanıb-qarşılanmayacağı sual altındadı. Hələ icraçı direktor Firuz Abdullanın “Football-plus.az”a açıqlamasını da xatırlayırıq. O, imkanlar daxilində addım atılacağını, hətta əldə olan materialla yola davam etmək variantının olduğunu da deyib. Cavid Hüseynovun ikinci variantda uğur qazanmayacağı dəqiqdisə, birinci ehtimal da risklidi. “Dənizçilər”in premyer-liqada qalması üçün daha təcrübəli mütəxəssisə ehtiyacı var. Məşqçi karyerasında qazandığı uğurlar futbol ictimaiyyəti üçün sirr olmayan birinə...

Odu ki, Bayıl təmsilçisinin rəhbərliyi baş məşqçinin mətbuat konfranslarında səsləndirdiyi fikirləri diqqətlə götür-qoy etməli, qış fasiləsində daha doğru qərar verməlidi. Mayda deməyin ki, “Futbol+” demədi...

KƏNAN BAHADIR