Belə görünür ki, “Barselona” mövsümün əvvəlində hədsiz çox tərifləndi.

Başgicəlləndirici uğurların ardından artıq böhran yaşanır. Ötən tur səfərdə “Real Sosyedad”a uduzan kataloniyalılar bu dəfə qələbəni inanılmaz şəkildə əldən verdi. “Selta” son 6 dəqiqədə onların qapısından iki top keçirdi. Təbii ki, Madrid klubları – “Atletiko” və “Real” “Barsa”nın büdrəməsindən yararlandı. “Hindular” “Alaves”i məğlub etdi, “ağ şimşəklər” isə “Leqanes”lə oyunda heç bir çətinlik çəkmədi. Ançelottinin komandası itirilməyən xallara görə “Barsa”dan indi yalnız 1 xal geri qaır. Halbuki cəmi iki tur əvvəl bu fərq 9-a bərabər idi.

“Barselona” Viqoda sanki San-Sebastyandakı oyunun davamını gətirdi. Fərq ondan ibarətdi ki, kataloniyalılar “Selta” ilə sədər oyununda elə ilk maraqlı hücumda fərqləndilər. Levandovski 61-ci dəqiqədə Rafinyanın ötürməsindən sonra 2-ci qolu vuranda hər kəsə elə gəldi ki, artıq oyunun taleyi həll olundu. Ancaq “Selta”nın oyunçuları ruhdan düşmədilər. Düzdü, 77-ci dəqiqədə təkbətək çıxan Rafinya topu dirəyə vurmasaydı, möcüzə olmayacaqdı. 5 dəqiqə sonra 2-ci dəfə sarı vərəqə ilə cəzalanan Kasado “Barsa”nı azlıqda qoydu. Ardından Kunde inanılmaz səhvə yol verməklə fərqin azalmasına səbəbkar oldu. Cəmi iki dəqiqə sonra müdafiəçilər Alvaresi də gözdən qaçırdı. Flikin sonda reallaşdırdığı tələsik dəyişikliklər işə yaramadı.

“Leqanes”in qonağı olan “Real” heç bir problem yaşamadı. Böyük üstünlüyə malik olan madridlilər hissənin sonunda Bellingem – Vinisius – Mbappe kombinasiyası sayəsində hesabı açdı. Fasilədən sonra da oyunun axarı dəyişmədi. Meydan sahibləri yenə də hücumda passiv idi. 2-ci qol oyunun taleyini həll etdi. Cərimə zərbəsi zamanı Valverde sol “6-lığ”ı dəqiq nişan aldı. Arda ilə Mbappe imkanları qaçırsa da, Bellingem 85-ci dəqiqədə “Real”ın 3-cü qolunu vurdu.

“Alaves” Madrid nəhəngləri ilə oyunlarda sensasiyanın astanasından qayıdır. “Atletiko” ilə oyunda heç-heçəni qorumaq da mümkün olmadı. Baxmayaraq ki, “Alaves” artıq 7-ci dəqiqədə hesabı açmışdı. “Hindular” fasiləyə qədər hesabı bərabərləşdirə bilərdi. Ancaq Lino topu tirə vurdu, Lyorentenin cərimə meydançası xaricindən iki zərbəsinin qarşısını isə Sivera aldı. Simeone fasilədən sonra həm penaltiyə səbəbkar olan Qalanı, həm də Lyorenteni oyundan alaraq növbəti dəfə sağ cinahda oğluna şans verdi. Bu dəfə qələbəni Culiano yox, onunla eyni vaxtda meydana çıxan Sörlot gətirdi. Norveçlinin qazandığı penaltini Qrizmann qola çevirdi. Sona 4 dəqiqə qalmış isə Sörlot özü də fərqləndi.

Turun qalan oyunlarına gəlincə, ilk “4-lüy”ə düşməyə iddialılar – “Osasuna” ilə “Vilyarreal” Pamplonada “sülh”ə razılaşdı. Meydan sahibləri Budimirin erkən qolları ilə 2:0 önə çıxsa da, fasilədən sonra oyunun axarı dəyişdi. “Sarı sualtı qayıq” bərabərlik qolunu 3-cü uzatma dəqiqəsində vurdu. Bask derbisində “Atletik” evdə “Real Sosyedad”a qalib gəldi. “Xetafe” və “Sevilya”, uyğun olaraq, “Valyadolid” və “Rayo Valyekano” üzərində “quru” ev qələbəsi qazandı. “Valensiya” və “Jirona” da ev oyununda çox inamlı təsir bağışladı. “Yarasalar” “Betis”in qapısından 4 top keçirdi, öz qapısında iki qol gördü. “Jirona” da ardıcıl 2-ci ev oyununda 4 qol vurdu. Kataloniyalıların budəfəki qurbanı “Espanyol” oldu. Ümumiyyətlə, turun oyunları hədsiz yüksək məhsuldarlıq şəraitində keçdi: 34 top vuruldu ki, bu da ortalama 3,5 qol deməkdi. Ada komandaları da trenddən geri qalmadı: “Malyorka” Kanar adalarında “Las Palmas”ı 3:2 hesabıyla məğlub etməklə “avrokubok zonası”na yaxınlaşdı.

14-cü tur
Selta – Barselona 2:2
Qonsales, 84. Alvares, 86 – Rafinya, 15. Levandovski, 61. (24573)
Barselona: Penya, Martin (Fort, 46), Martines, Kubarsi, Kunde, Pedri (Lopes, 75), Kasado, Qavi (De Yonq, 75), Olmo (Torre, 89), Rafinya, Levandovski (Viktor, 89).

Leqanes – Real 0:3
Mbappe, 43. Valverde, 66. Bellingem, 85. (12338)
Real: Kurtua, Qarsiya, Rüdiger, Asensio, Valverde, Bellingem (Endrik, 87), Sebalyos, Kamavinqa, Vinisius, Gülər (Dias, 75), Mbappe (Modriç, 83).

Atletiko – Alaves 2:1
Qrizmann, 76-p. Sörlot, 86 – Quridi, 7-p. (58910)
Atletiko: Oblak, Qalan (Sörlot, 46), Lanqle, Vitsel, Aspilikueta, Lino (De Paul, 64), Lyorente (Simeone, 46), Barrios, Koke (Rikelme, 70), Qrizmann, Korrea (Alvares, 59).

Osasuna – Vilyarreal 2:2
Budimir, 8; 20-p. – Baena, 67. Moreno, 90+3-p. (19795)

Atletik – Real Sosyedad 1:0
Sanset, 26. (50719)

Xetafe – Valyadolid 2:0
Rodriges, 70. Nyom, 73. (9911)

Sevilya – Rayo Valyekano 1:0
Sou, 27. (35125)

Valensiya – Betis 4:2
Tarrera, 8. Duro, 50; 53. Lopes, 56 – Duro, 14-öz qapısına. Avila, 66. (43975)

Jirona – Espanyol 4:1
Xil, 4. Miyovski, 16; 21. Kreyçi, 27 – Puado, 55. (12461)

Las Palmas – Malyorka 2:3
Essuqu, 77. F.Silva, 83-p. – Rodriges, 46. Navarro, 56. Moxika, 90+1. (22940)

1. Barselona 14 11 1 2 42-14 34
2. Real 13 9 3 1 28-11 30
3. Atletiko 14 8 5 1 21-8 29
4. Vilyarreal 13 7 4 2 25-21 25
5. Atletik 14 6 5 3 20-13 23
6. Osasuna 14 6 4 4 19-22 22
7. Jirona 14 6 3 5 20-18 21
8. Malyorka 14 6 3 5 13-12 21
9. Betis 14 5 5 4 16-16 20
10. Real Sosyedad 14 5 3 6 11-11 18
11. Selta 14 5 3 6 22-24 18
12. Sevilya 14 5 3 6 13-18 18
13. Rayo Valyekano 13 4 4 5 13-14 16
14. Leqanes 14 3 5 6 13-19 14
15. Xetafe 14 2 7 5 10-11 13
16. Alaves 14 4 1 9 15-24 13
17. Las Palmas 14 3 3 8 18-25 12
18. Valensiya 12 2 4 6 12-19 10
19. Espanyol 13 3 1 9 12-26 10
20. Valyadolid 14 2 3 9 10-27 9

Bombardirlər: Levandovski (Barselona) – 15, Vinisius (Real), Rafinya (Barselona), Budimir (Osasuna) - 8.
Növbəti turun oyunları noyabrın 29-u – dekabrın 2-si aralığında keçiriləcək: Malyorka – Valensiya, Barselona – Las Palmas, Alaves – Leqanes, Espanyol – Selta, Valyadolid – Atletiko, Vilyarreal – Jirona, Real – Xetafe, Rayo Valyekano – Atletik, Real Sosyedad – Betis, Sevilya – Osasuna.

Turun rəqəmi
700 – Dieqo Simeone “Atletiko”nun “sükanı arxasında” oyun sayını bu həddə çatdırdı. Komanda bu müddətdə 413 qələbə qazanıb, 156 dəfə heç-heçə edib, 131 dəfə uduzub. Simeone İspaniya futbolu tarixinə bir komanda ilə belə nəticə göstərən ilk mütəxəssis kimi düşdü. Argentinalının “hindular”ı 2011-ci ildən bəri çalışdırdığını da xatırladaq.

Turun ulduzu
Allan Nyom (Xetafe) – sağ cinah müdafiəçisi qələbənin memarı oldu. Bu komanda, adətən, çox qol vurmur. Nyom isə həm qol vurdu, həm də məhsuldar ötürmə verdi. Belə nəticəni fərqləndirməyə dəyər!

Turun sitatı
Jül Kunde, “Barselona”nın müdafiəçisi: “Konsentrasiya çatışmazlığından əziyyət çəkdim, bunun əvəzini kobud səhvlə ödədim. Əsasən mənim günahım üzündən heç-heçə etdik. Son iki oyunda o qədər də yaxşı təsir bağışlamamışıq. Nəhayət, komanda olub-olmadığımızı göstərməyin vaxtı çatıb”.

Fakt
“Barselona” 31 oyundan sonra ilk dəfə heç-heçə etdi. Sonuncu dəfə martın 3-də “Atletiko” ilə heç-heçəyə (0:0) razılaşan kataloniyalılar növbəti 31 oyunda ya qalib gəlmiş, ya da uduzmuşdu.

Oyundan sonra
Hans-Diter Flik, “Barselona”nın baş məşqçisi: